Shillong, Jymmang 08
Hadien ka jingïoh ka jingujor na ki samla kiba dei ki DIET Trainees halor ka jingbym pat ïoh ïa ka bai bam (stipend) mynta la shi snem tam ei-ei, na ka liang ka Voice of the People Party (VPP) State Youth Wing, ka la leit ban ïakynduh ïa u Vijay Kumar Mantri, IAS, Commissioner & Secretary ka tnad Education ka Sorkar Jylla ban pan jingshai halor kane ka mat.
Haba kren sha ki lad pathai khubor u Samla Nathaniel Mawrie, Secretary, u la ong ba na ka liang u Commissioner & Secretary u la pynshai, ba u la dep ban phah ïa ka shithi sha ka tnad finance, hynrei haduh mynta ka pisa ka dang sahkut ha katei ka tnad.
Nalor kata, u ong ruh ba na ka liang u Commissioner u la kular ban leh ei-ei halor kane mat.
U Bah Marbud Dkhar, President, u la ong ba ka jingbym ïoh ki samla ïa katei ka pisa ka la buh jingeh ïa ki bad kumta u la ong ba ka VPP kan ïai buddien halor kane ka kam.
U Bah Marbud u la ong ruh ba na ka liang u Vijay Kumar u la kular ba ïa ka pisa yn sa siew ha une u bnai ba mynta, ka VPP kan bat ïa kaei ba u Vijay u kular bad lada um pyllait ka pisa ka VPP kan sa wan biang ban buddien halor kane ka kam.
U ong “Haba ïadei bad ka scholarship ka Sorkar ka ju ïai pynslem beit man ka por, la ka long ka scholarship ki khynnah pule bad mynta ruh kane ka stipend jong ki nonghikai ruh kim shym la pat pyllait haduh mynta. Kane ka Sorkar ba mynta ka long kyllaiñ bha bad ngin nym ailad haba ïadei bad kane ka bynta”.
“Lada ki samla pule ki slem ban siew ïa ka bai skul ne kolej kin duh ban shong ha ki klas bad kin duh ruh ban thoh ïa ka exam, hynrei balei pat ka Sorkar ka pynslem pat ïa kane ka hok jong ki nonghikai,” la ong u Bah Marbud.
Namarkata, u Bah Marbud u ong ba ka VPP SYW kan ïai buddien halor kane ka kam bad ka jingkular jong u Vijay, ban sa siew noh ka pisa ha une u bnai ba mynta.
