Nongstoiñ, Jymmang 08
U President ka Voice of the People Party (VPP), u Bah Ardent Miller Basaïawmoit u la ong ba kumba long mynta ki ong kumno ba ka VPP ka shu pyrshah lut ïa ka roi ka par, ki projek katba ki wan, “Ngim pyrshah ïa ka roi ka par ngim pyrshah ïa kano-kano ka jingmyntoi ka ban pynmyntoi ïa u trai-muluk, trai jaka hynrei ngi pyrshah ïa ka roi ka par kaba pynduh nong ïa ngi ki trai-muluk trai-jaka kaba pynïohnong ïa ki briew kiba nabar jong kane ka Jylla.”
Ïa kane, na ka liang u Bah Ardent Miller Basaïawmoit u la ong bad pynpaw ha ka jingïalang paidbah ban pynshai halor ki mat ïakhih ka seng kumjuh ruh ha kaba ïadei bad ka ilekshon MP shiteng samoi kaba la long ha ka Sngi Thohdieng jong ka taïew ha Riangdo, Civil Sub-Division.
Shuh shuh u Bah Ardent Miller Basaïawmoit u la ong ruh ba don kiba kylli jingkylli ba phi ïoh aiu ba phi kyrshan ïa ka VPP, namar balei ki kylli kumta namar ïalade ki don ha kane ka Sorkar ki bit ki biang ka kamai ka kajih ki ïoh kam kontrak puk-puk, ki ïoh lad ban khaïi dewiong tuh katba mon, ki ïoh ban leh lut ki jait kam, hynrei ka VPP ka ai ïa ka jaidbynriew kaba nyngkong ka jingai kaba kordor eh ka jong ka seng ïa u paidbah ka dei ka jingïatylli jong ka jaidbynriew.
“Mynta ngi ïohi ïa ka jingïatylli jong ka jaidbynriew Khasi ka jong ngi, ngi long kawei ka jaidbynriew kaba sdang ban wandur bha dei namar ba ka VPP bad ki nongïalam jong ka VPP ki pynsngewthuh ïa ngi ka jaidbynriew ba ngi donkam ban long kiba ïatylli, bad kat shaba ngi leit mynta ki paidbah ki ai ka jingkyrshan,” ong u Bah Ardent.
Shuh shuh u la ong ruh ba don ki ba ong ba kane ka seng ka dei tang sha Ri-lum Khasi bad Jaiñtia, bad kam jop wat tang shi seat ruh ha ka MDC hynrei ngi la jop haduh 8 ngut ki MDC bad kine ki 8 ngut ki MDC ki la rung hangtai hapoh JHADC ban pyndep hok ïa la ka jong ka kamram kaba ki dei ban kren kumba ka seng ka la btah ïa ki.
U Bah Ardent u la bynrap ruh da kaba ong ba, “Kane ka dei ka jingai kaba nyngkong, ka jingai kaba ar ïa ki paidbah kaba ki nongïalam ki ai ka long ka jingshlur ban pynshlur ïa ngi kum ka jaidbynriew ba ngim dei ban long kiba khaw pud, ngi dei ban kloi ban ïeng ban ïa khun ïa la ka jong ka hok katta ka jingshlur kaba mih na uwei-uwei u khun Khasi ba ngin ym tieng ïa kano-kano ka jingleh bym dei watla ngi don marwei.”
U la ong ruh ba ka don ka jingpyrshang mynta ban ïalam bakla ïa ki paidbah ban kynnoh ïa ka VPP kaba ka dei ka seng kaba shu pyrta surok, hato ki paidbah ki ngeit ïa kata ka kyntien, phim ju ïohi ba ngi kren hapoh Assembly, balei ngi hap ban mih kumne ka don ka daw kaba khraw ban pynshai ïa ki paidbah ba kim dei ban shah ïalam bakla.
Ha kane ka sngi, la donlang ruh u Bah Birbor Riangtem, Chairman Election Committee, Mawshynrut Constituency, Bah Grosspar Ryntathiang, Treasurer ka seng, Bah Marbud Dkhar, President Youth Wing Central Body, u MDC ka Nongkrem, Bah Kitbor Syiem, u MDC ka Nongstoiñ, Dr. Juristman Ïawphniaw ha ryngkat ki ‘riew rangbah bad ki longkmie ka seng na Nongstoiñ, Rambrai, Mawthadraishan bad kiwei-kiwei.
