Shillong, Jymmang 08
U Symbud Myntri Rangbah ba dei peit ïa ka tnad ka kit ka bah jong ka Sorkar Jylla u Bah Sniawbhalang Dhar ha ka sngi Thohdieng u la ong ba la pynkhreh ïa ka “work order” na ka bynta ban pynheh ïa ka kad liengsuiñ ha Umroi, kaba shongdor kumba 80 klur tyngka bad la khmih lynti ba shen yn sa sdang ïa ka kam.
U la ong ba ïa kane ka projek dei ban pyndep hapoh 18 bnai naduh ba la pynmih ïa ka “work order”.
Halor ka jingdawa ban pynïasoh beit sha ka kad liengsuiñ na ka Shillong Bypass, u Bah Dhar u la ong ba ka jingtrei ka la ïaid shakhmat.
“Ka jingtrei ka la dep ïaid shaid-shaid namar ka surok na Belfont-Langkyrding sha Secretariat ba thymmai bad nangta beit-beit sha kad liengsuiñ, ka surok ka dang ïaid shakhmat ïa kaba la mang haduh 135 klur tyngka ba la mang da ka tnad PWD”, u la ong.
Ha kaba ïadei bad ka jingshim jaka na ka bynta ban pynheh ïa ka kad liengsuiñ, u Bah Sniawbhalang u la ong ba donkam ïa ka jingjurip lang shwa ban pyndep ïa ka jaka.
“Nga la ong ïa u Deputy Commissioner ha ka taïew ba la dep ban jurip biang bad ban pynlong biang ïa ka jingjurip lang bad ka Airport Authority of India ban pynbeit ïa ka jaka ban buh ïa ka jaka ba la bynrap shwa ba ngin ïoh ïa ka,” u la ong.
Shuh shuh u la ong, “Shwa ba ngin shim ïa ka jaka, hap ban pynlong ïa ka jingjurip lang hapdeng ki heh ka Sorkar Jylla bad ka AAI khnang ba ngin ym shim ïa ka jaka kaba bakla. Ngi hap ban peit bniah ïa ka lynti, ïa kane bad ïa katai, bad haba ki ong ba ka long kaba bha, kam don jingeh ïa ngi. Ngi long kiba kloi ban thied ïa ka jaka ha kano-kano ka por.”
