Shillong, Jymmang 08
Ka jingïalang kaba lai sngi jong ka Commission of Inquiry halor ka jingjia bthei ka krem dewiong ha Thangsko ha East Jaiñtia Hills District ka la kut noh ha ka sngi Thohdieng ha State Guest House ha kaba ka kynhun ba la khlieh da u Justice (Retd) R.S. Chauhan ban bishar ïa ki tnad Sorkar, ki kynhun tih marpoh khyndew bad ki longïing jong kiba mad ïa ka jingsngewsih.
Ka kyrwoh ba la pynmih da u Secretary jong ka Commission ka la ong ba ïa ki jingai jingmut la buh jingthoh na ki nongïashim bynta bapher-bapher hapdeng ka 6 tarik haduh ka 8 tarik mynta u bnai Jymmang 2026.
Ha ka sngi ba nyngkong, ka kynhun tohkit ka la sngap ïa u Principal Chief Conservator of Forest bad u khliehduh jong ka Forest Force, Shillong, ka Central Mine Planning and Design Institute Ltd., Ranchi, ka Ministry of Coal, New Delhi bad ka Director, Directorate of Mineral Resources, Shillong. Ha ka sngi kaba ar la ïoh ïa ki jingpynpaw na ka seng ki nongkhaïi jong ka thaiñ Shallang, West Khasi Hills, bad ka seng ki trai bad nongshalan marpoh khyndew jong ka South West Khasi Hills.
Ka sngi khatduh ha ka 8 tarik u Jymmang la kynthup ïa ki jingai jingmut na ka North Eastern Space Application Centre, ka Indian Bureau of Mines, bad ki bahaïing hasem jong kiba mad ka jingsngewsih.
“Ka jingïalang ban wan jong ka Commission kan long naduh ka 13 tarik haduh ka 15 tarik Naitung 2026”, la ong ka kyrwoh.
“Ka Commission kan leit jngoh ïa ka jaka ba jia ha ka 13 tarik u Naitung 2026 bad kan bteng ban pynlong ïa ka jingtohkit.”
Ka Commission ka la pynmih ruh ïa ka jingpynbna paidbah ha ki kot khubor phareng bad ki kot khubor trai ri ha kaba khot ïa kiwei pat ki jingpynshisha.
“Kiba kwah ban ai jingmut shuh-shuh ki lah ban leh da kaba thoh sha u Secretary, Commission of Inquiry, kamra 228, Main Building, Meghalaya Secretariat, Shillong lane da kaba phah email ha commission.inquirymeg@ gmail.com,” la bynrap shuh shuh ka kyrwoh.
