Shillong, Jymmang 10
Ka ding kaba jur ka la klang ha ka miet jong ka 9 tarik u Jymmang 2026 bad bam duh ïa saw tylli ki dukan kiba don harud surok ha ka thaiñ Them Bijoy kiba don marjan ka Ajmira.
Ki ïing kiba la shah pynjot ha ka ding kaba jur ki kynthup ïa ka dukan die jingbam (Fast-Food), ka dukan khapsniuh (hair salon), ka dukan diesha bad kawei pat ka dukan die marbam ba die ïa ki mar bapher-bapher.
Kane ka jingjia ka la jia ha ka por kumba 10 baje janmiet, tang mar ïa mih ka jingpluh ki briew kiba don ha kitei ki dukan ki la ïaleh ban weng noh ïa ki tyndong lyer shet (Gas Cylinders) ba don hapoh ki dukan bad kane ka la ïarap ban khanglad ïa ka jingpluh kaba jur bad ba ka ding kan ym pur sha kiwei pat ki dukan kiba don marjan.
La suba ba kane ka jingpluh ka la mih na kawei ka dukan kaba dei ka dukan die jingbam (Fast-Food) kaba lah ban dei na ka daw ka jingthud ka bording.
Ki pulit pynlip ding ka tnad Fire Service, tang mar ïa ïoh jingtip, mar-mar ki la mareh sha katei ka jaka bad ban tem ïa ka ding. Namar ka jingkloi jong ki Fire Service la lah ban pynlip ïa ka ding bad na ka jingpur ka ding sha ki dukan kiba marjan.
Katkum ki khubor ba la lum na katei ka jingjia, kam shym la don kano-kano ka jingmynsaw ki briew, lait noh ka jingjulor ki saw tylli ki dukan bad ka jingduhnong ki mar ki mata.
