Jowai, Jymmang 09
U Symbud Myntri Rangbah ka Jylla uba khmih ruh ïa ka tnad PWD (Roads) Bah Prestone Tynsong ha ka 9 tarik Jymmang u la buh maw nongrim ïa ki saw tylli ki projek pynheh surok ba la bei lyngba ka Sorkar Meghalaya kaba kot 24 klur tyngka tam.
Ïa une u maw nongrim la buh ha ka jingplie ïa ka jaka treikam ba pura jong ka Barato Police Outpost ha ka 9 tarik Jymmang.
Kine ki saw tylli ki projek surok ki kynthup ka jingpynbha pynmiat bad pynheh ïa ka surok sha ka Intermediate Lane BM&SDBC na Nartiang-Ionglwit-Barato ha ka jingjrong kaba 14.00-21.0 Km ba kot T.16,93,40,000.00.
Ka jingsiang rong ïa ki surok hapoh ka shnong Shilliang Myntang ha ka jingjngai kaba 1.650 Km kaba kot T.3,07,19,800.00.
Ka jingsiang rong ïa ki surok hapoh ka shnong Maitdieng ha ka jingjrong kaba 3.00 Km hapoh ka RIDF-XXX kaba kot T.3,00,00,000.00 bad ka jingmaramot thymmai ïa ka surok na 13th NJB sha Thadbamon ha ka jingjngai kaba 3.017 Km kaba kot T.1,78,67,000.00.
U Bah Prestone ha ka jingkren u la khot ka jingïatreilang hapdeng ki nongïalam shnong, ki paidbah bad ki sahep Sorkar, khnang ba kino kino ki projek bad lad pynroi kiba wan hapoh ka thaiñ kin nym long kiba lehnohei.
U Bah Prestone u ngeit skhem ba kine ki projek surok, kin ai jingmyntoi nyngkong eh ïa ki paidbah ka thaiñ. U la ban jur ruh ba lada don kino kino ki jingiwit jingithut ha ka rukom pyntrei ïa ka surok, ban mih shakhmat ban pynbeit mardor.
Nalorkata, u Bah Prestone u la ai jingmut ruh ïa ki bor pynïaid shnong jong ka thaiñ Barato ban thaw kawei ka Synjuk na ka bynta ban ïasyllok bad ka Sorkar halor kino kino ki jingeh jong ka thaiñ, da kaba ban jur ba ïa ki mat lah ban weng bad poi sha ka jingsngewthuh jingmut, tang lada ka jingïatreilang ka don hapdeng ka Sorkar bad ki bor synshar shnong synshar thaw.
