Shillong, Jymmang 10
Ka Agatha K Sangma Chairperson jong ka Meghalaya State Commission for Protection of Child Rights (MSCPCR) ka la ong ba haba ïadei ka jingbret khun kawei ka longkmie ba na Ri-bhoi District, ka Commission ka la dep ban shimkhia ban leit ïakynduh ïa kiba ha ïing ha sem bad ban ai ka jingïasyllok.
Haba kren sha ki nongthoh khubor ha ka sngi Saitjaiñ, ka Agatha la ong ba ka Commission kan sa pynlong ïa ka jingtih bniah ïa ki jingjia bret ki kmie ïa ki khyllung ba dang shukha bad ban jur ruh halor ka jingdonkam ban hikai bad ban pynkup bor ïa ki kynthei. “Na ka Commission ngi la shimkhia bha bad ki dkhot jong ngi ba dei na Ri-Bhoi District, ki la leit dalade bad ïa kynduh ïa kiba ha ïing ha sem” ka la ong.
“Ka DPCU ka la shimkhia bad ka la pynthikna ruh ïa ka jingai jingïasyllok ïa ka Kmie kaba la bret ïa la I Khun” la ong Agatha.
Ka Agatha ka ong ba ki jingpynsngewthuh bad ki jingai jinghikai ki long kiba donkam ban ai khnang ban lah ban tehlakam ïa kum kine ki jingjia. “Kane ka dei ka kam kaba donkam ïa ka jingïapyrshang lang na baroh ki liang kynthup ki lad pathai khubor” ka la ong.
Haba kylli la ka Commission kan nang shim shuh-shuh ïa kino kino ki sienjam, ka Agatha ka la ïathuh ba, ïa kaba mynta kam pat don eiei. Namar kane ka dei kawei na ki jingjia kiba jia, hynrei lada kum kine ki jingjia ki nang ïai jia, ka Commission kan hap ban leh eiei.
Halor ka hukum ka High Court ba dang shen ba ïadei bad ka jingshongkha khynnah, ka Agatha ka la ong “Ka High Court ka la shimkhia bha ïa kane bad mynta ïa ki Case Romeo-Juliet yn ym kheiñ shuh kum ki POCSO Case” ka la ong.
“La ai mynta ïa ka jingïasyllok ïa ki shijur ki bym dei ki POCSO Case, namar ba ki dang dei kiba dang khynnah ka rta” ka la ong.
