Shillong, Jymmang 10
U Symbud Myntri Rangbah ka Jylla ka tnad kam pynroi sor, Bah Sniawbhalang Dhar u la ong ba ka Sorkar Jylla kan sa khmih bniah ïa ka jingthmu haba ïadei bad ka jingpynkynriah ïa 342 tylli ki longïing na Harijan Colony ha Them Ïew Mawlong ha ka jingïalang ban long ha u bnai ban wan, ha kaba ka lad ban pyndonkam ïa ki jaka ïada ri (defence land) ka dang don hapdeng ka jingpyrkhat.
“Nga tharai ha u bnai ban wan ngin sa don biang ka jingïalang halor kane ka mat. Ngin sa pyntip,” la ong u Bah Dhar haba jubab ïa ki jingkylli halor ka jinglong-jingman jong ka jingtyrwa kaba sahteng la slem.
La ka Sorkar kan shim ïa ka jaka ïada ri na ka bynta katei ka kam, u la ong ba ym pat shim ïa kano-kano ka rai halor kane.
“Ngim pat shim ïa ka rai la ngin ïaid shakhmat bad ka jaka ïada ri, la ki long kiba la khreh ne em, ne la ngin ïaid katkum ka saiñdur ba hashuwa,” u la ong.
“Ngi hap ban shim ïa ka rai halor kane,” u la ong.
Haba kylli la ka tnad ïada ri ka Sorkar Pdeng ka la jubab ne em ïa ka jingkyrpad jong ka Jylla, u Bah Dhar u la ong ba ki ophisar ki dang ap ïa ki jingai jingmut.
“Ki ophisar jong nga ki ïatreilang bad ki, kumta ngi dang hap ban ïoh ïa ka kaiphod na u ophisar ka tnad kam pynroi sor halor kaei ka jingtip kaba thymmai na ka liang ka tnad ïada ri, u la ong.
“Tang hadien kata, ngin sa lah ban shim ïa ka rai halor kane ka mat,” u la ong.
