Jowai, Jymmang 10
Ka Synjuk ki Seng Rangbah Katholik, Jowai Diocese ha ka 9 tarik Jymmang kala aiti ïa ka ïing bathymmai sha ka longïing baduk ha ka shnong Sohphoh, West Jaiñtia Hills District ba la shna lyngba ka jingpynlong ïa ki prokram pynmih pisa bapher bapher halor ka jingthmu ban tei ïa ki ïing baduk hapoh ki artylli ki District ka Jaiñtia Hills.
Ïa kane ka ïing la plie da u Fr. Augustine Lamin uba long ruh u Spritual Director jong ka Synjuk ha ka jingdonlang u Chairman ka Finance Committee Ma Augustine Kyndait, Secretary ka Social Relief Committee Ma Demitrius Nongtdu, Waheh Shnong Ma Mutshwa Thabah nalor ki nongïalam jong ka Synjuk kumjuh ruh ki Dkhot ka Seng Rangbah Parish Ummulong.
La aiti ïa kane ka ïing bathymmai sha ka Kong Riana Kharsohnoh bad u Ma Aiborlang Suting ryngkat bad lai ngut ki khun shynrang kiba dang rit ha ka jingïalang kaba la pynïaid da u Secretary General ka Synjuk Ma Hubert Thyrniang.
Ka Kong Riana Kharsohnoh ka ai khublei kyrpang ïa ka Synjuk ki Seng Rangbah kiba la shim ïa kane ka sienjam ban pynurlong ïa ka jingphohsniew jong ki baduk ba rangli.
