Shillong, Jymmang 10
U Myntri Rangbahduh ka Ri u Narendra Modi ha ka sngi U Blei u la kyntu ïa ki nongshong shnong ban ïarap ïa ka Ri ban kunai ïa ka umphniang, kum ka petrol ka diesel bad ki pisa bar ri da kaba pyndonkam da ki kali paidbah, ban kiar na ki jingleit jingwan shabar ri ki bym donkam bad ban kiar na ki mar bym donkam.
Kane ka jingkyrpad u Modi ïa ki paidbah ka dei namar ka dang bteng ka jingïakynduh jingeh ha Middle East ban pynpoi ïa ka umphniang sha kiwei ki ri ka pyrthei.
“Ka jingieid ri kam dei tang ka jingkloi ban pha ïa la ka jingim ha khappud, hynrei ka jingieid ri ka dei ban im da ka jingkitkhlieh bad ban pyndep ïa la ki kamram sha ka jaidbynriew ha ka jingim kaba man la ka sngi,” la ong u
Modi ha jingïalang ha Hyderabad.
U Myntri Rangbahduh u la khot ïa ka jingïashim bynta lang ban ïarap ïa ka India ban ïakynduh ïa ki jingthut ha ka ïoh ka kot ha ka pyrthei, ki jingeh ha ka jingpynbiang marbam, bad ka jingkiew dor namar ki jingïaleh pyrshah jong ki ri ha ka pyrthei.
U Modi u la kyntu ïa ki paidbah ka ri India ban pynduna ïa ka jingpyndonkam ïa ka umphniang petrol bad diesel da kaba pyndonkam ïa ki metro bad ki kali paidbah ha kano kano ka jaka ba lah, da kaba jied ïa ka “car-pooling” bad kham jied ïa ki lynti rel ban kit ïa ki mar ki mata.
Kumjuh ruh u la kyrshan ruh ïa ka jingpyndonkam ïa ki kali ilektrik.
U la kwah ruh ban pynim biang ïa ki lad treikam ha ka juk Covid na ka bynta ka jingmyntoi jong ka ri, kynthup ïa ka jingtrei na ïing, ki jingïalang online.
U la kyrpad ïa ki paidbah ka ri ban kiar na ki jingleit shuti shabar ri bad ki jingkhawai shongkurim shabar ri ban pynim ïa ka pisa bar ri. U la kyrpad ïa ki paidbah ban kiar na ka jingthied ksiar bym donkam eh na ka bynta shisnem. U la kyrpad ruh ïa ki longïing ban pynduna ïa ka umphniang bam, ba kan ai jingmyntoi ïa ka koit ka khiah jong ka ri bad ka koit ka khiah shimet.
U la pynshlur ïa ki paidbah ban buh hakhmat eh ïa ki mar ba la shna ha India bad ki mar ba la shna ha la ka jong ka ri, kynthup ïa ki tiar ba pyndonkam man ka sngi kum ki juti, ki pla, bad ki tiar pyndonkam.
U Myntri Rangbah u la bthah ïa ki nongrep ban pynduna ïa ka jingpyndonkam ïa ki sboh dawai da 50 percent bad ban pyndonkam da ki pump pyntuid um kiba pyndonkam da ka bor sngi ha ka jaka jong ki pump diesel ha ka rep ka riang.
U la bthah ruh ïa ki paidbah ban jied ïa ka kam jngohkai pyrthei hapoh ka ri.
