Shillong, Jymmang 10
Halor ka jingkren jong u Conrad K. Sangma, Myntri Rangbah ka Jylla, ba ka Voice of The People Party (VPP) ka kyntait hi ban leit sha ka All Party Meeting halor ka Reservation Policy, na ka liang u Dr. Airpiece Rani, nongaiktien ka party, u la phah ïa ka kyrwoh ban pynshai halor kane ka mat.
Ha ka kyrwoh kaba la phah la ong, ba ka VPP ka la kyntait ban poi sha katei ka jingïalang, da kaba ïeng ha la ka nongrim da kaba pynshai ba ka party ka ïengskhem ba ka jingïatai halor ka Reservation Policy kan dei beit ha ka Ïingdorbar Thawaiñ ka Jylla, hynrei ka Sorkar ka kiar ban ïakren halor kane ka mat ha Iingdorbar Thawaiñ, katba ka wanrah pat ha ka All Party Meeting.
Ka VPP lyngba u Dr.Aipeace ka la kynthoh ïa ka Sorkar Jylla da kaba ong “Ka Sorkar ka kiar ban ïakren ïa ka RP ha Iingdorbar Thawaiñ bad kiba leit sha ka All Party Meeting dei kiba don jingïadei bad ka MDA”.
U La ong ruh ba ka jingdawa ka VPP ka long ban pynbeit ïa ka, katkum ka jingbun paid, hynrei ka Expert Committee ba la thung da ka Sorkar Jylla, ka la shim ïa ka katei ka mat ba ka long kaba kongsan bad ban kyntait ïa katei ka jingai jingmut, bad kumta ka VPP kam lah ban pdiang ïa kane.
U Dr.Airpeace u ong ruh ba ka All Party Meeting ka long pynban kum ka kam saiñ hima sima, ha kaba kiba ïashim bynta ha ka, kidei kiba don bynta bad ka Sorkar MDA, da kaba kdew ba wat ka Indian National Congress ruh ka la pdiang ïa ka jingai jingmut katei ka Committee bad kumta ka jingbym ïashim bynta jong ka ha katei ka jingïalang ka long kaba don jingmut.
Shuh shuh u la ong ruh, ba ka VPP kan ïengskhem na bynta ka hok ki riewlum bad lada ka Sorkar ka mynjur ban kyntiew ïa ka bhah ki Khasi-Jaiñtia sha ka 47% ka VPP kan pdiang bad kan ai burom ruh ïa ka Sorkar hynrei ka jingkren jong u Myntri Rangbah ka Jylla, ka long kaba ïalam bakla.
“Kaba kongsan kam dei ha ka jingbympoi sha ka jingïalang hynrei ba ka Sorkar ka shimkhia ne-em ban pynbeit ïa ki kynrum kynram ha ka RP,” u la ong.
U la pynksan ruh da kaba ong ba “Ka VPP ka skhem beit ha ka rynsan kaba biang tam, kaba don ha ka synshar paidbah bad kaba don ha ka riti synshar paidbah ban ïakren ïa ka Reservation Policy ha Iingdorbar Thawaiñ ka Jylla”.
