Shillong, Jymmang 10
U Symbud Myntri Rangbah ka Jylla uba dei ruh National Vice-President ka NPP, u Bah Sniawbhalang Dhar u la ong ba ki jingtip ba la ïoh lum da ka seng ki pyni ba u President ka KAS, u Dr. D.R.L. Nonglait, u kyrtong uba ka NPP ka la jied na ka bynta ka ilekshon shiteng samoi sha ka Lok Sabha, u long uba la “pdiang da baroh”.
“Hadien ba la pynbna ba u Dr. Nonglait un long u kyrtong ka seng, ki jingtip ba ngi ïoh lum, i-kumba la pdiang ïa u da baroh – na baroh ki bynta jong ka imlang-sahlang,” la ong u Bah Dhar.
Haba ai khublei ïa ki bahaïing jong u Dr. Nonglait, u la bynrap, “Na ka liang jong nga, nyngkong eh nga pynpaw ïa ka jingsngewnguh bad ka jingkhublei kaba kyrpang ïa ki bahaïing hasem jong u Dr. D.R.L. Nonglait. U la pdiang ïa ka jingtyrwa jong ka seng.”
U Bah Dhar u la pynïasoh ïa kane ka jingpdiang kaba ïar sha ka rukom ïamir jingmut jong ka NPP.
“Haba ngi kwah ban pynbna kyrtong, ngi kum ki nongïalam ngim ju leh marwei,” u la ong.
“Dei na kata ka daw ba ngi khot ïa ki nongïalam jong baroh 36 tylli ki ‘Block’ kum ka dak jong ka jingsakhi lang, kum ka dak jong ka jingïatreilang bad jingïarai lang. Nga ïohi ka dak jong ka jingkmen ba u Dr. Nonglait u la mynjur,” ong u Bah Dhar.
Haba shim ïa ki daw jong u Dr. Nonglait ban rung sha ka saiñ pyrthei kum “ka dak kaba bha shibun”, u Bah Dhar u la ong, “Kumba u la ong, nga wan sha ka saiñ pyrthei ban tei ïa ka imlang-sahlang, ban weng ïa ka jingshun hapdeng ki briew lajong, namarba ngi sngewthuh ba lada ngim ïa ïeid para briew, kumno ngin ieid ïa ka imlang-sahlang jong ngi. Kane ka pyni ba u dei u briew uba la ih.”
U la ong ba ka seng ka shim ïa kane ka jinglong kyrtong kum kaba kongsan na ka bynta ka Jylla.
“Ngi hap ban trei met bad mynsiem khnang ba ngin lah ban wanrah ïa ka jingjop na bynta u kyrtong jong ngi. Ka jingjop jong u ka dei ka jingjop jong ka Jylla baroh kawei,” la ong u Bah Dhar.
Haba kyrpad ïa ki nongthep ‘vote’, u la bynrap, “Nga kyrpad ïa ki nongshong shnong ka Jylla khamtam ïa ki samla ban ailad ïa u ban long u shakri uba paka tam na ka bynta ka Jylla jong ngi (baroh kawei) ban mihkhmat ïa ngi ha Parliament.”
