Shillong, Jymmang 10
U Samla Lambokstarwell Marngar, President, ba la shongthait noh na ka Khasi Students Union (KSU) u la kynthoh jur ïa ka Sorkar Jylla, da kaba ong “Ngi dangkhmih lynti ba ki nonghikai kin rung sha ki kamra klas, hynrei ka Sorkar ka phah rung ïing briew pynban”.
Ia kane u Samla Lambokstarwell Marngar u la kren ha ka jingïalang jied nongkitkam ba thymmai ka KSU na ka bynta ka samoi treikam jong u snem 2026-29, kaba la long ha Dinam Hall, Jaiaw.
“Ngi ïoh ka Sorkar kaba kumno,” buh jingkylli u Samla Lambokstarwell.
U Samla Lambokstarwell u la kynthoh ïa kane halor ka jingpynbna ka Sorkar ban phah ïa ki nonghikai ban leit lum khana samari ne census.
U la ong ba ka KSU kam kwah ban put turoi, hynrei shipara ngin ïai long bad khmih lynti ba kine ki Samla ki ban sa ïalam mynta ïa ka kam ruh, kin pyntyllun ïa ka shalyntem treikam kum kawei ka kynhun.
Ka kti kamon ka kti ka diang jong kawei ka pawei ka shnat treikam jong ka KSU, kan dei ka bor ka iktiar watla ka Sorkar ka dangsngap ïa ki mat jingdawa ka seng, u la ong, da kaba bynrap ruh ba “Nga ju ong ba ki dkhot ka KSU kin long ka aiñ, ban pynthikna ba ka ri bad ka jaitbynriew kan ïeng rasong bad ki mynder kin nym ïoh lad ban wan buhai shnong hapoh ka ri kaba ieid jong ngi”.
