Shillong, Jymmang 10
U Samla Raymond Kharjana, uba la shah jied thymmai kum u President ka Khasi Students Union (KSU) sengkmie, u la pynpaw ka jingsngewbynnud ïa ki Samla Rangbah kiba la ïalam lynti ïa ka seng naduh ki por mynshuwa, hynrei u ong “Ki nongïalam ki leit bad ki wan, hynrei ka nongrim jong ka seng, ka ïaineh bad ka ïaiskhem na kawei ka por sha kawei pat”.
U la ong ba 48 tylli ki snem ka jingïaid lynti jong ka KSU, 16 tylli ki General Elekshon, hynrei katba dangïaid ki sngi phin ïohi ba ka seng kan dangkhlaiñ bad nangïoh bor.
“Ki jingtynjuh kiba bun rukom hynrei kadei ka jingskhem nongrim ym tang ki nongïalam hynrei u wei pa u wei u dkhot ruh bad nga ngeitskhem ba ka seng kan nangïai khlaiñ nangne shakhmat namar ba kiba bun ki samla kiba nud ban len lade, na ka bynta jong ka ri bad ka jaitbynriew,” la ong u Samla Raymond.
“Ngim pat ong ei-ei haba ïadei bad ki mat ki jur, kiba ki nongïalam ba thymmai kin shimti, namar ba ka KSU kamdei ka seng kaba rai shimet, kadei kaba ïaid ryngkat ryngkat bad jingïasyllok kum kawei ka kynhun,” u la bynrap.
U la ong ruh ba ngin nym artatien ba ki mat kiba rim, ki mat kiba ktah ïa ka ri bad ka jaitbynriew kin ïaineh bad ngin dangpynjanai kumno ban pynurlong ïa ki jingthmu ki jong ngi.
“Hooid, ngin nym lah ban kular ïa ka jingjop ha man la ki mat kiba ka KSU ka ïakhun hynrei nga kular hangne ka long, ba ngin nym man thait pat. Watla lada ngi khyllem ngin ïeng biang, wat lada ngi hap ïeng biang, ngin ïai kren bad pynsngew ïa ki jingeh jong ka ri bad ka jaitbynriew,” la ong shuh shuh u Samla Raymond.
U Samla Raymond u la kdew ruh haba ïadei bad ka jingkhih phaloh katto-kattne, da kaba kynthoh ïa ki briew kiba tynjuh ïa ka seng, ba wat nym ktah ïa ka rew jong u ngap ïoh phi shah kynthah, namar ka seng jong ngi, don ïa ki dkhot ki bym salia ban mih madan na ka bynta ka daw bah jong ka jaitbynriew. Kam pher lada ngin tur na ka ding ne na ka snam hynrei ki dkhot jong ka seng kin dei kiba nyngkong eh ki ban wan shakhmat ban ïeng ban kren bad ban ïakhun na ka bynta ka daw bah ka jaitbynriew.
