Nongstoiñ, Jymmang 10
U Bah Kimfa Sidney Marbaniang, MLA barim ka Rambrai Jyrngam ryngkat ki nong kyrshan ba radbah jong u, ha ka sngi Saitjaiñ jong ka taiew ki la pynbna paidbah ba ki la mih noh na ka National People’s Party.
U Bah Kimfa bad ki nongkyrshan ki jong u, ki la shim ïa ka rai hadien ba ka kynhun ka la dep ïashong ban pynlong ïa ka jingïatai sani bha kumba katto katne kynta lyngba ka jingïalang ïa kaba la pynlong ha katei ka sngi ha ïingsah jong u, ha Rambrai.
U Bah Kimfa haba kren ha ki nongthoh khubor u la ong ba katei ka jingïalang ka dei ka jingïalang kaba ki shim ïa ka rai ban mih noh na ka NPP namar ha ki por ba la dep ki nongïalam ka NPP ki la kren shai ba kin pynrung beit ïa u Bah Lurshai Kharbani, MDC ka Rambrai kum u dkhot jong ka NPP.
U Bah Kimfa u la kam ruh, “Na ka liang u Bah Lurshai bad u MLA kim kwah ban ïatreilang bad ngi, te dei na kane ka daw ba ngi na ka liang ki paidbah, ki nongkyrshan jong ka NPP kiba la ïa kyrshan bad ïakhun ha ka ilekshon MDC ngi la ïa rai ban mih noh na kane ka seng”.
Shuh shuh u la ïathuh ruh ba na ka liang jong u, bad ki nongkyrshan haduh mynta kim pat don kano kano ka rai ban rung ha kano kano ka seng hynrei katkum ka jingïamait phang ki riew rangbah ki longkmie, ki nongkyrshan hi ki la ïa rai ban thaw shuwa da ka Rambrai Jyrngam United People Forum ban pynïaid shakhmat ïa ki kam bad hadien kata lada don kano kano ka seng kaba pdiang ïa ki ban ïakhun ïa ka ilekshon ki kloi ban leit ha kata ka seng.
“Ïa mynta hi ngim shym la don kano kano ka ban ong hynrei ngi ngeit skhem ba lyngba ka jingïatylli ka jong ngi, ka jingïatrei shitom ka jong ngi, ngin dang lah ban wanrah shibun ki jingangnud jong ki paidbah ïa kaba ha kine ki snem ngi la pyrshang bad ngin ïai pyrshang ban shakri ïa u paidbah katba ngi lah,” ong u Bah Kimfa.
Ha katei ka sngi la thung ïa u Bah Kimfa Sidney Marbaniang kum u Chairman ka Forum bad ïa u samla Kitborlang Lyngdoh kum u Secretary bad ha kajuh ka por baroh kitei ki nongkyrshan ki la ai shi syndon da ka ‘Mass Resignation’ ne ka jingïasoi lang baroh ki nongkyrshan ha ka shithi kaba ki la kdew sha ka NPP.
