Shillong, Jymmang 10
Ka jingleit rung u Dr. DRL Nonglait sha ka seng NPP ban long kum u kyrtong na bynta ka ilekshon MP Lok Sabha na Shillong Constituency ka la pynsah umdum ïa ki dkhot ka Khasi Authors’ Society namar u khlem pat ieh ïa ka shuki President jong kane ka seng.
Haba ïakren bad u Bah Raphael Warjri uba dei u dkhot ka Executive Committee ka KAS u la pynpaw ka jingsngewkyndit ban ïohi ha ki lad pathai khubor ba u President ka KAS u Dr. DRL Nonglait un leit rung sha ka kam saiñpyrthei khlem da kynjoh ktien ïa ka seng KAS.
U la ong kane ka jingleit rung jong u sha ka seng NPP ka dei ka jingleit rung shimet namar u khlem pat ai kano-kano ka shithi iehnohkam ïa ka seng KAS.
U la ong biang ba katkum ki kyndon treikam ka KAS shisien ba la rung sha ka saiñpyrthei ym shah ban long nongïalam ha ka seng.
“Lada u nongïalam u la leit rung sha ka saiñpyrthei, ngi la sah ha ka umdum hynrei ka shong ha ki dkhot ka EC la kin dang pynskhem biang ïa u Dr. Nonglait ne kin jied bujli noh” u la ong.
Haba kylli la ka KAS kan dang buddien ne em ïa ka ktien Khasi ban pynbor ïa ka Sorkar ba kan wanrah kum ka aiñ ba pura ha ïingdorbar, u la ong ba ka seng kan sa shong pyrkhat.
Kumban shu pynkynmaw ka Khasi Authors’ Society ka la ïoh jingïaroh na ki paidbah hadien ba ka la pynurlong ïa ka Sorkar Jylla ban pynrung ïa ka ktien Khasi kum ka ktien Sorkar hynrei hadien katto katne sngi u President ka KAS u Dr.DRL Nonglait u la leit ban pynïasoh noh sha ka seng NPP ha ka 7 tarik mynta u bnai ban ïakhun kum u kyrtong ka NPP ha kane ka ilekshon shiteng samoi ban sa long shen.
Ka jingkylli mynta ka mih la ka KAS kan dang pynskhem ïa u Dr.DRL Nonglait kum u President ne kan weng noh.
