Shillong, Jymmang 10
Ka North-Eastern Hill University Teachers’ Association (NEHUTA) ha ka Sngi U Blei ka la kyntu ïa ki seng saiñ pyrthei kynthup ïa ka Voice of the People Party (VPP) ba kin buh ïa ka saiñ pyrthei shabar jong ka skulbah bad ka la kyntait ruh ïa ki jingkam u Pro Vice-Chancellor (PVC) halor ka jingpynslem haba ïadei bad ka jingthung kam.
U President ka NEHUTA, u Prof. Lakhon Kma u la jubab halor ka jingmih khubor kaba kdew ïa ka jingkren jong u President ka VPP Youth Wing, Bah Marbud Dkhar halor ka jingkren jong u PVC, u Prof. S. Umdor haba ïadei bad ka jingpynslem ha ka jingthungkam ha NEHU.
“Na ka liang ki seng saiñ pyrthei kynthup ïa ka VPP, ka NEHUTA ka kwah ban kyntu ba kim dei satia ban leh politik ha kane ka skulbah,” ong u Prof. Kma ha ka kyrwoh.
“Shabar jong ka skulbah, ka bun ka jaka ban ïaleh politik bad ban ïakhun ilekshon,” u la ong.
Ka NEHUTA ka la kynnoh ba u PVC, u Prof. S. Umdor u la ïalam bakla ïa ki paidbah bad ïa ka VPP Youth Wing ba balei ba 154 tylli ki kam ‘Group B’ bad ‘C’ ba la pynbna ha ka 3 tarik Naiwieng, 2023 ki la kut noh.
Ka tarik ba khatduh na ka bynta ban phah ïa ki kot ki sla ka long ha ka 12 tarik u Nohprah, 2023, bad ka jingpynbna ka la kut noh ha ka 2 tarik u Naiwieng, 2024.
“Ka long kaba bakla ha ka jingshisha ïa u PVC ban pynpaw ba ïa ka rukom thung kam ym shym la lah ban pyndep bad ka la kut namar ka jingthut ha ka jingtreikam jong ka skulbah da ki kynrum-kynram ba hapoh,” ong u Prof. Kma.
U la kdew ba ka jingïakhih shah thngan jong ki samla pule ka la sdang tang hadien ba ki ‘Post’ ki la kut noh.
“Ka jingïakhih shah thngan jong ki samla pule kaba la kyrshan pura da ki nonghikai bad ki nongtrei bym dei nonghikai ka la sdang naduh ka 5/11/2024 bad kut ha ka 21/11/2024,” u la ong.
“Ka jingpynbna ka la kut noh ha ka sien kaba 3 ym namar ki jingïakhih hynrei namar ka jingbym don jong u VC ha kata ka por, ka jingbym shimkhia pura jong u ïa ka bha ka miat jong ka skulbah bad ka jingkiar shi syndon na ki kam jong ka NEHU ha ka samoi treikam ba pura jong u,” la kynnoh u Prof. Kma, da kaba kdew ïa u VC barim, u Prof. P.S. Shukla.
“Hapdeng ka tarik ba khatduh, kata ka 12/12/2023 bad ka 2/11/2024, u Prof. Shukla um shym la leh eiei ban pyndap ïa ki kam bad u Prof. Umdor u pyrshang ban ïalam bakla ïa ki paidbah,” u la ong.
“U Prof. Umdor u pyrshang tang ban ïada ïa ka jingbym larkam jong u VC ban pyndep ïa ka jingthung kam ha ka sien kaba lai,” u la ong.
Halor ka VPP Youth Wing, u Prof. Kma u la ong, “Ka jingbym don jingtip bad jingshisha jong ki ka la ai lad ïa u PVC ban ïalam bakla ïa ki, lada ki khubor ki long kiba shisha kumba la paw ha ki khubor. Nga shu kwah ba kin leh bha ïa ka ‘homework’ jong ki shuwa ban leit mih sha ki bor pynïaid jong ka skulbah, kiba nangta kin ym ïalam bakla ïa ki bad ïa ki paidbah ka Jylla Meghalaya.”
Shuh shuh ka NEHUTA ka la ban biang ïa ka bynta jong ka kum ka nongpeitngor ha ka skulbah.
“Ka NEHUTA ka ïai long kum ka nongpeitngor ïa ka rukom pynïaid kam jong ki Vice Chancellor bad kiwei-kiwei ki ophisar jong ka skulbah bad kan ïai bteng ban pynbiang ïa ki jingpeit bniah kiba donkam na ka bynta ka bha ka miat jong ka skulbah,” la ong u Prof. Kma.
