Nongpoh, Jymmang 11
Kawei ka kali Tata Tiago kaba don ïa u registration number AS01-FF-8936 kala leit ban noh sha ka riat kaba jrong kumba 40-50 phut bad poi syndon sha ka wahrit kaba don ha 17 Mer, Ri Bhoi District namar ka jingpynher sted kaba palat pud, kat haduh ba u nongñiah um lah shuh ban tehlakam ïa ka kali.
La ïathuh ba katei jingjia ka dei ha ka por kumba 4 baje eiei janmiet ha ka sngi U Blei katba katei ka kali ka dang hiar na nongbah Shillong sha Guwahati bad hap sha katei ka riat ynda poi ha kitei ki bynta ba khongwaiñ ka surokbah National Highway 6.
La ïoh jingtip ba ki don kumba san ngut ki briew kiba shong hapoh katei ka kali, ki la lait thaw salit na ki jingjia ba sngewsih bad ngat tang ha ki jingmynsaw ba malu mala ryngkat bad ka jingjulor jong ka kali.
Kitei ki san ngut ki kynthup ïa u nongñiah, u Nawar Ahmed Choudhury (24), u Tauhed Laskar (25), ka Goma Pun, ka Nikita Pradhan lem bad ka Sneha Tamang. Baroh kine ki dei kiba shong ba sah ha ka jylla Assam.
Na ka liang ki bor pulit ka thanad Byrnihat kiba la wan poi mar mar ha katei jaka tang mar ïa ïoh jingtip, kila tan noh ïa katei ka kali sha thanad Byrnihat bad pynlong ruh ïa ka jingtohkit halor kane ka jingjia.
