Nongpoh, Jymmang 11
Ki samla pule jong ka College of Post Graduate Studies in Agricultural Science (CPGSAS), Umiam ha ka sngi Nyngkong ki la mih paidbah ban ïakhih da kaba shong kyllaiñ mungor ryngkat ki plakad bad ki jingpyrta shla ban weng kam mardor ïa u Prof. Pranab Dutta, Chairman, School of Crip Protec-tion halor ka jingkynnoh donkti ban leh kynshleiñ ïa ar ngut ki samla pule.
Katkum ka jingïoh lum khubor, la ïathuh ba utei u nonghikai ka CPGSAS kaba hap hapoh ka jingkhmih jong ka Central Agricultural University (CAU) Imphal, la kynnoh ba u la leh kynshleiñ la bunsien pyrshah ïa ar ngut ki samla pule ha kine ki khyndiat bnai kiba lah dep.
La ïathuh ruh ba ka daw kaba la pynlong ïa ki samla pule kiba dei na ki Jylla bapher-bapher kiba wan pule ha katei ka jaka ban mih madan ha kane ka sngi, ka dei ba wat hadien ba ki la dep ban ujor, ki bor ba dei khmih ïa katei ka jaka pule kim shym la shimkhia ban leh eiei pyrshah ïa utei u Prof. Pranab Dutta kat haduh kine ki sngi kiba mynta.
Halor kane ka bynta, na ka liang ki samla pule ki dawa na ki bor bahalor katei ka jaka pule ba ki dei ban wengkam mardor ïa u Prof. Pranab Dutta bad ba lada kane kam urlong, kim banse ban ujor wat sha ki bor ba halor katei ka jaka pule kaba hap hapoh ka jingkhmih jong ka CAU, Imphal.
Hapdeng katei ka jingïakhih, la wan poi u Majistor bad ki bor pulit ban tuklar na ka bynta ban pynbeit ïa katei ka kam kaba la ktah ïa ka jingtreikam katei ka jaka pule, khamtam ban pynthikna ba kan nym mih kano-kano ka jingjia kaba lah ban ktah ïa ka shongsuk shongsain.
Na ka liang ki samla pule ha kaba nyngkong ki la pyneh beit triang bad pynpaw ba kin nym sangeh satia ïa ka jingïakhih ka jongki, katba kim pat ïoh ban pdiang ïa ka kaiphod jingtohkit jong ka Internal Complaint Committee (ICC) kaba ki la dep ban ujor.
Hadien ka jingshimkhia jong u Masjistor, u la pyntip ruh sha ki samla pule ba ka ICC kala pynthikna ban pynlong ïa ka jingtohkit bad ban shim ïa ki sienjam katkum ki kyndon pyrshah ïa utei u nonghikai, ha kaba ki samla pule ki la rai ban sangeh noh shipor ïa ka jingïakhih ka jong ki bad rai ruh ban ujor syndon da ka ejahar pyrshah ïa utei u nonghikai uba ki kynnoh donkti ban leh kynshlein ïa ar ngut ki samla pule.
Ha kane ka sngi, la sakhi ruh ïa ka jingwan poi jong ki nongïalam ka Women Organisation of Ri Bhoi District (WORD) hapoh ka jingïalam jong ka Kong Mirajune Myrsing kum ka President bad Kong Rivulet Kylla kum ka nongaibuit lem bad kiwei de ban wan ai jingkyrshan ïa ki samla pule ba ïakhih, khamtam ïa ki ar ngut ki samla pule kiba la shah leh kynshleiñ ha u Prof. Pranab Dutta bad dawa ba ki bor ba dei khmih ki dei ban pynlong ïa ka jingtohkit kaba bniah bad ban pynshitom ruh ïa utei u nonghikai katkum ki kyndon jong ka aiñ.
