Shillong, Jymmang 11
Ki katto katne ngut ki samla nongshong shnong jong ka Elaka Mawlong ha ka lah sngi u Blei, ki la leit ban kynduh ïa u Executive Member (EM) ka tnad Elaka u Bah Denzil R Chen ban pynkynmaw ban shimkhia haba ïadei ka jingujor ba ki la ai pyrshah ïa u Sirdar Mawlong halor ka jingbym long Dorbar la bun snem.
Hadien ka jingaiti ïa ka shithi ban pynkynmaw, u samla Basdonal Khyllep u la pynpaw ka jingsngewkmen namar ba u EM u la kular ba ka Council kan sa shimkhia ban pynlong ïa ka Dorbar bad u la pan por katto katne ba kin leh ïa kaba donkam.
“Ngi kum ki khun samla bad kum ki nongshong shnong ka Mawlong ngi la sngewkmen ba u EM u la pan por ba un sa pynlong ïa kata ka Dorbar, khnang ban ïoh ban ïatai ïathir ha ka Dorbar,” u la ong.
Katkum ka jingong u samla Basdonal la kynnoh ba u Sordar katei ka shnong um ju lum ïa ka Dorbar la jan 10 snem eiei bad um ju ai jingkheiñ naduh u snem 2016. Nalor kata u la kdew ba katkum ka Mawlong Act, u Sirdar u dei ban lum bad ai jingkheiñ shisien shisnem, hynrei kaba sngewsih ka long ba haduh mynta um pat ju pynlong ïa ka Dorbar Hima.
