Nongstoiñ, Jymmang 11
Ka Shad Suk Mynsiem jong ka Seng Khasi West Khasi Hills ka la long kaba la ïaid beit ïaid ryntih bad kaba la iphuh iphieng bha ha ka sngi Nyngkong jong ka taiew ïa kaba pynlong ha madan New Nongstoiñ.
Ha kane ka sngi haduh 257 ngut eiei ki nongshad ba kynthup ïa ki kynthei bad shynrang kila wan ban ïashimbynta shitrhem ha kane ka sngi.
U Bah P Ryntathiang, President ka Seng Khasi West Khasi Hills District u la ïathuh ba ha kane ka jingshad ka khlem don kano-kano ka jingpynthud jong u slap, kumba la ngeit skhem lyngba ka khnong ka bishar jong ngi ha ka por ba ngi noh kjat ïa ka shad u slap u la rang noh. U la bynrap ruh ba “Kane ka dei ka jingsngewthuh ka jong ngi lyngba ka khan ka bishar ka jong ngi ba U Blei ruh u sngap bad u sngew”.
U la ong ruh ba kane ka shad ka dei ka shad niam jong ka jaidbynriew Khasi bad kane ka shad kam dei kaba la shad tang mynta ha kine ki sngi ne ki snem hynrei ka dei ka shad jong ka jaitbynriew bad mynshuwa eh ka don ka jingshad niam ha manla ki jong ki jong ki kur bad naduh ka snem 1835 bad 1862 ha kaba u Tirot Sing bad u Kiang Nangbah ki shah kem noh ha ki bor shipai phareng, na kata ka daw kane ka jingshad ha ki kur kala nang hiar nang hiar noh hynrei dei hadien jong ka snem 1889 ha kaba ki nongïalam jong jaidbynriew Khasi kata ki 16 ngut ki nongseng ïa ka Seng Khasi ha Shillong ki sa pynlong noh ïa kane ka shad kaba la tip mynta kum ka “Shad Suk Mynsiem”.
U la ong, “Ngi ïohi mynta haba ngi don ha man la ki lympung shad, baroh baroh ki jait bad ki kur ki la ïa mih ban ïashim bynta ha kane ka Shad Suk Mynsiem jong ngi hynrei mynshuwa ha ka jait jong ngi ha ka kur jong ngi la pynlong la ka jong ka shad niam namar ngi tip ba khlem don ka shad ha ka niam kam long kaba iphuh iphieng, te ka niam ruh kam lah ban ïaid beit lada ngim don ka shad”.
“Nga sngew ban ong ba ka long ka jingsngew sarong ïa ka jaidbynriew ba ngi dang lah ban bteng ïa kane ka shad niam ka jong ngi kum ba ju long mynta,” u la ong.
U pynpaw ruh ba kane ka dei kawei ka khubor kaba u kwah ban ong ruh ïa kiwei kiba shong ha kano kano ka jaka ba mynta kim dei ban sngew diaw, kim dei ban khuslai ban lynga, kane ka shad niam ka long ïa baroh lang lehse ki don kiba artatien ki bym sngew thuh, ha kaba la khot bad wer lang kum ka khubor ban ong to wan ban ïa donlang la ka long ha kano kano ka jaka.
Ha kane ka sngi la wan ban ïasakhi lang da u Dr. Juristman Ïawphniaw, MDC ka Nongstoiñ bad kiwei kiwei ki tymmen ki San jong ka Seng Khasi hynrei ym shym la poi ki ophisar Sorkar kiba na ka district.
