Shillong, Jymmang 11
Ka jingpyndonkam ïa u duma ka la poi sha ki bynta kiba shyrkhei ha ka Jylla, ha kaba jan mar shiteng na baroh ki rangbah kiba la 15 snem shaneng ki pyndonkam duma bad jan 8 hajar ngut ki briew ki khlad noh man u snem namar ki jingpang ba ïadei bad u duma, la ong ka State Nodal Officer for the National Tobacco Control Programme, Dr. Nabaneeta D. Mawrie ha ka Lah Sngi U Blei.
Haba kren ha ka jingsdang ka jingïalap jong ka ‘World No Tobacco Day 2026’, ka Dr. Mawrie ka la ñiew ïa kane kum ka “jingsngew khia kaba jur ïa ka koit ka khiah ki paidbah” bad ong ba donkam ban leh eiei kyrkieh ban ïada ïa ki samla bad ki imlang-sahlang jong ka Jylla.
“U duma um dei tang ka jingmlien, u dei ka jingma ba la shna pynwandur bha uba pynngop ïa ki samla bad ki imlang-sahlang jong ngi”, ka la ong.
“Jan shiteng na ki rangbah kiba la 15 snem shaneng ha Meghalaya kiba pyndonkam ïa u duma, bad jan 8,000 ngut ki briew ki khlad noh man u snem namar ki jingpang kiba ïadei bad u duma; ka jingshimkhia ban leh eiei noh kloi ka long kaba donkam eh,” ka la ong.
Ïa kane ka jingïalap jong ka WNTD’26 la sdang hapoh jong ka phang “Tobacco! Business of DEATH,” kaba ïadei bad ka phang pdeng jong ka pyrthei baroh kawei, “Unmasking the appeal, countering nicotine and tobacco addiction.”
Kane ka jingïalap kaba la sdang naduh ka 6 tarik u Ïaïong kan ïaid sha ki skul bad ki kolej ha kylleng ka Jylla ha u bnai Ïaïong bad Jymmang, bad kan kut ha ka 31 tarik u Jymmang.
Ka Dr. Mawrie ka la ong ba kane ka jingïalap ka thmu ban lum ïa ki shlem pule ban ïalam ïa ki jingïaid paidbah, ki jingïasoi paidbah, bad ki jingkner ïa ka jingpynsngewthuh sha ka imlang-sahlang ban ïakhun pyrshah ïa ki buit jong ki karkhana bad ban kyntiew ïa ka jingjied kaba bniah hapdeng ki samla pule.
“Ka jingïalap ka thmu ban pynpaw pyrthei ïa ki buit ba sniew ba la pyndonkam da ki karkhana pynmih duma, ban pynshlur ïa ki samla pule ban jied ïa ki sienjam kiba bniah bad kiba koit ba khiah, bad ban pynkylla ïa ka jingpynsngewthuh sha ka jingtreikam kaba kit jingmut ha ka imlang-sahlang,” ka la ong.
Ka la kdew ruh ïa ka jingïaid shakhmat jong ka sienjam hapoh ka ‘Tobacco Free Educational Institutions’, ba la pyntreikam ha ryngkat ka Sambandh Health Foundation.
Ha kine ki saw snem ba la dep, palat 9,000 tylli ki skul bad jan 6 lak ngut ki khynnah pule ha Meghalaya ki la ïashim bynta ha ki jingpynsngewthuh paidbah halor ka jingma jong u duma.
Ka ophisar ka tnad pule-puthi, Kong Jennyfer J. Synrem ka la ong ba ka jingïashim bynta shit rhem jong kiba bun ha u snem ba la dep ka pyni ba ka jingïalap ka la nang kiew.
“Ha u snem 2026, ym dei tang ba ngi bteng ïa ka jingïalap, ngi tei ïa ka jingïakhih paidbah,” ka la ong.
“Ki skul kim dei tang ki jaka pdeng jong ka jingpule hynrei ki long ki nongwanrah ïa ka jingkylla,” ka la ong.
Ka Deputy Commissioner ka South West Garo Hills, ka Anendya Raajsshre, IAS, ka la ong ba ka jingpyrshang kaba neh ka long kaba kongsan.
“Ka jingkylla kaba shisha ka wan jia haba ka jingpynsngewthuh ka kylla long ka jingtreikam. Ki jingthmu kum ka WNTD bad ToFEI kim dei tang ki jingïalap, ki dei ki jingkular ban ïada ïa ki jingim,” ka la ong.
La khmih lynti ba kane ka jingïalap kan khring ïa ka jingïashim bynta na ki skul, ki kolej, ki tnad Sorkar, ki kynhun seng, bad ki kynhun imlang-sahlang hashuwa ban poi sha ka sngi ‘World No Tobacco Day’ ha ka 31 tarik Jymmang.
