Shillong, Jymmang 11
Ki kynhun sengbhalang na Mawsynram Sub-Division ba kynthup ïa ka HNYF, FKJGP, HYC, ha ka step jong ka sngi Nyngkong, ki la leit rah plakad kynsan ha ïingsah jong u Myntri ka tnad sam bording ka Sorkar Jylla, u Bah Metbah Lyngdoh, ban pynsngew biang ïa ki mat jingdawa, halor ka jingaiti ka Sorkar ban sam bording ha ka SAI Computer limited.
Ha ki plakad ki kynhun sengbhalang ki la dawa “Weng noh mardor ïa ka jingaiti kam sha ka SAI Computer Limited, “Ngi dawa jingpynshai na u Myntri tnad Bording,” “Ka Mawsynram Sub-Division kam dei ka ïew ban die,” “Lada phim weng ïa ka SAI Computer Limited, sngewbha weng noh ïalade na ka kam Myntri tnad Bording,” bad kiwei-kiwei de ki mat jingdawa.
Hadien kumba katto-katne por eiei ba ki kynhun sengbhalang ki la ïeng hakhmat ïing, na ka liang u Bah Metbah u la khot noh mar-mar shapoh, ha kaba u la khot ïa ki ban wan ha ophis, ban ïakren halor kane ka kam.
Haba kren sha ki lad pathai khubor u Bah Kyllang Thongni, nongaibuit ka kynhun sengbhalang na Mawsynram Sub-Division u la kynnoh, ba ka SAI Computer Limited ka leh tang ban ïohnong ïalade, “Kumta ngi dawa beit na ka Sorkar, ban wengnoh mardor ïa katei ka ka SAI.”
U la kynnoh ruh ba ka SAI ka leh donbor ïa ki nongshong shnong ka Mawsynram, bad byrngem ba lada ka jingdawa kam urlong, kin sa tur sha Secretariat ha ryngkat ki paidbah ka Mawsynram.
“Kane ka kam sam bording ha ka thaiñ Mawsynram da ka SAI Computer Limited ka la pynsngewkhia haduh katta-katta, namar ka Sorkar ka la shu pynbna beit beit ba la aiti ïa ka kam sam bording ha katei ka kompeni kaba dei nabar Jylla. Ngi la ju ïai pynsngew man ka por sha ka Sorkar, hynrei kam shym la don kano-kano ka jingpynbeit ne jubab, kumta ka la pynlong ïa ki kynhun sengbhalang na Mawsynram ban wan rah plakad syndon hakhmat ïing jong u Myntri,” la ong u Bah Kyllang Thongni.
