Shillong, Jymmang 11
Ki riew Rangbah ka Hima Sohra ha ka lah sngi u Blei ki la mih ban kren pyrshah bad kyntait ïa ka jingkynnoh u President ka Voice of the People Party u Bah Ardent Miller Basaiawmoit haba ïadei ka kam thung Syiem hapoh ka Hima.
Haba ïakren ïa ki nongthoh khubor, u Pa’iem Laborius Syiem u la pynphai nia ïa ka jingkren u Bah Ardent ha ka 7 tarik u Jymmang ha Mawlai, da kaba ong, “Ngi ngin ym ïakhleh jaktung ha ka jingleh politik ha ki surok ne ha kano-kano ka jingleh politik kano-kano ka sengsaiñ pyrthei kaba phi lah ban khot kyrteng”.
U Pa’iem Laborius u la ong ba ka jingïakhun ka jong ki ka long ba ka jingleh politik kam dei ban ïoh rung ne ban pynjot ïa ki sankyrwoh ka saiñ Dorbar u Khun Khasi, kata ka Dorbar Ïing, ka Dorbar Kur, ka Dorbar Shnong, ka Dorbar Raid bad ka Dorbar Hima, u la ong ba kine ki dei kita ki bor synshar ba naduh na tynrai bad ki la neh mynta da ki spah snem bad kiba dei ka borbah ha ka ban tehsong ïa ki khun ki ksiew u Hynñiewtrep Hynñiewbasa.
U la ong, ba ki khlieh nongsynshar kin ïeng skhem ban ïakhun ban da ban ker ïa ki hok, ki riti dustur, ba la ïoh pateng na u mynbarim, u longshuwa u manshuwa bad ban ym shah da lei-lei ruh ïa kano-kano ka bor ba thmu ban bujli da kumwei pat, namar ba ki sngewthuh shai, lada ïa ka hok, ki riti ki dustur la duh noh, ki jingneh jingsah ki sdien ha ka lyer.
U la ong, ba ka jingleit tur ki khun ki hajar ka Hima Sohra ha Shlem treikam ka KHADC ha ka 7 tarik u Jymmang ka long ban pynpaw ïa ka jingpyrshah ïa ka jingleh bymhok bad ban dawa ban pynbeit mardor ïa kane ka jingleh bymhok, “Ka Dorbar Khlieh ki Nongsynshar Hima Sohra bad ki khun ki hajar ka ïeng pyrshah ïa ka jingleh bym hok jong ka KHADC pyrshah ïa ka jingkordor ka tynrai jong ka jingjied ïa u Syiem da ka Hima Sohra,” u la ong.
Shuh-shuh u u la ong, katba ki dang wad ïa ki lad ban ïa pynbeit na ki bor kiba dei khmih, ka long kaei kaei kaba sngewsih ba u Ardent u la pynman ïa kane ka mat ban kren ha ki jingïalang politik jong ka VPP ha ka por ba ai jingkren ha Mawlai.
“Ka kamram ka jong nga kam dei ban pynshisha ba nga dei, ka kamram ka jong nga ka dei ban ïai bat ïa ka dongmusa tad haduh ba ki khun ki hajar ka ri u Laiphew Syiem bad Khatar Doloi kin lap bad ïaid ha ka lynti kaba dei” la ong u Pa’iem Laborius.
Da kaba kam ïalade kum uwei na kiba hiar pateng na ka “Kur Syiem,” u la ong ba u la shim ïa ka kamram ban ïada bad ban bat skhem ïa ka riti ka dustur kaba tehsong lang ïa baroh ki paidbah.
“Bah Ardent, ha ka jingkthong ka jong phi ïa ka shuki saiñ pyrthei (Political Chair), i kumba phi kloi ban ïuhroit ïa ki sankyrwoh ki sankyrdan ka saiñ Dorbar kiba pynthikna ïa ka jingneh ka jingsah ka jong ngi” ula ong.
U Pa’iem u la kynnoh ba u Ardent u la pynthohbria ïa ka jinglong shida bad ka jingdawa hok jong ki khun ki hajar ka Hima Sohra ban ïoh noh ïa la u jong u Syiem uba ki la jied hok ha ka nongrim ka riti ka dustur bad ka niam jong ka Hima Sohra.
U Pa’iem Laborius u la kyntait ïa ka jingkynnoh ba ki paidbah kiba la leit tur sha KHADC ki dei kiba don jingïadei bad kano-kano ka sengsaiñ pyrthei. “Phi pynman ïa ki briew kiba lui-lui kum ki briew jong ka NPP, phi la pulom ha ka ban ïohi ïa ka jingshisha ba ka jingtehsong ka jong ki kam dei na ka politik sengsaiñ pyrthei, hynrei ka jingieid ka jong ki ïa ka hok, ka riti ka dustur kaba la phrang ha ki jingtyllun jong ka por kaba la ïoh pateng na ki longshuwa manshuwa kaba la pynshong nongrim ha ka jingstad jong u barim bad ki kpa tymmen ki jong ngi” u la ong.
U la buh jingkylli ïa ka jingtuklar u Bah Ardent, da kaba ong, “Ki la leit sha KHADC ban dawa ïa ka sanad ne ka kot pynskhem, ka kamram jong ka District Council ka dei ban pyndep. Phi dei u MLA, phim dei u MDC, ka bynta jong phi kadei ha Meghalaya Legislative Assembly. Balei phi wan tuklar hangne?”.
U Pa’iem Laborius Syiem u la kyntait ïa ka jingkynnoh ba u don jingïadei bad ka sengsaiñ pyrthei, kumjuh u la pynpaw ka jingsngewsih ba ki paidbah ba lui-lui ka Hima ki la shah kynnoh ba ki dei kiba kyrshan ïa ka NPP.
U la ong ba ka jingkitkhlieh jong u ka long barabor ban ïeng pyrshah ïa kano-kano ka jingshah lehbeiñ kaba ym shong riti bad ym shong nongrim jong uno-uno ne kano-kano bad ha kano-kano ka rukom.
U la kyntu ïa u Bah Ardent ban pynbeit noh mar-mar ïa kane ka jingkynnoh bad kiar raimaw raidieng noh na kaba kynnoh kumne naduh kane ka khyllipmat, da kaba u la ong ba “Lada phim leh ïa kane, kynmaw ba, ha ka hok ka shi kyntien, ka jingjler bad ka jingthok kan sa bishar bad kyrtoh kylla ïa phi” la ong u Pa’iem Laborius.
