Shillong, Jymmang 11
Ki nongdie madan hapoh MUDA, ha ka 11 tarik u Jymmang 2026, ki la poi ha ka jingïakulmar ha ryngkat bad ka kynhun ba la ïalam da ka Kong Biolin Pyrtuh, Kong Tellme, halor ka jingbym hun halor ka jingïoh ki dukan ban shongdie jingdie ha katei ka jaka bad ka jingbym pat ïoh Certificate Of Vending (COV) jong kiba dei hok ban ïoh.
Ka jingïakulmar ka la mih bad sdang ha ka por ba ki ophisar ka Shillong Municipal Board (SMB) ki la leit ban jurip ïa ki jaka shongdie jingdie ha MUDA, kaba la ujor da ki katto katne ngut kiba shongdie madan, ba ki bun ki dukan kiba la shna bad mih thymmai.
La ïoh jingtip ruh ba ha kane ka jingïakulmar, ka la don ruh ka jingïa ktah kti hapdeng ka Kong Biolin bad kitei kiba shongdie kiba la ujor.
Haba kren sha ki lad pathai khubor kawei na ki longkmie kaba shongdie madan ka la kynnoh, ba ka Kong Biolin Pyrtuh ryngkat bad ka khun jong ka, ki la ktah kti ïa ka, hapdeng ka jingïapynbeit halor ka jingmih tam ki dukan ha MUDA.
Ki longkmie ki la kynnoh beit-beit, ba ka Kong Biolin ka la shna katba mon ïa ki dukan ha katei ka jaka die jingdie bad ban ai ïa kiba ka mon, katba ïa kiba dei hok ban ïoh pat, kam ai satia.
Haba ngi la wad jingtip halor kitei ki jaka die jingdie kiba mih thymmai, bad wad jingtip na u CEO ka Municipal, hynrei u la ong, ba u khlem ai kano-kano ka jingbit ban shna ïa ki dukan thymmai.
Kumta ki la pynpaw ka jingsngewsih ba wat u CEO ka Municipal ruh um shym la ai bor ban shna ïa ki dukan hynrei ka Kong Biolin ka la shna hi ban leh donbor.
“Kiba trei ha Municipal ki pynpaw, ba kat ka bor jong ka Kong Biolin te ym don shuh bad kane ka la pynbitar ïa ngi, namar ba ki don bun ki dukan kiba thylli ki bym pat don ba pyndonkam, katba kiwei pat ki leh katba mon,” la ong ki nongdie madan.
Kitei ki longkmie ki la ïathuh ruh ba ha ka por ba mih ka huri hura, ka Kong Tellme ka la kren da kaba shai ban ong “Nga don haduh 25 tylli ki dukan ha MUDA bad u shabi ka Municipal ruh nga bat hi ma nga”.
Haba kylli halor ka jingïoh dukan ka Kong Tellme haduh 25 tylli, katba ki don pat ki bym ïoh tang i wei ban shongdie jingdie ha MUDA, kitei ki longkmie ba shongdie madan ki la kynnoh ba kane kadei beit ka jingdon jingïadei ka Municipal bad ki nongdie madan kiba hap hapoh ka jingïalam ka Kong Tellme.
Ki la bynrap ban ong “Kumno kawei ka briew ka ïoh haduh 25 tylli ki dukan ha MUDA, naduh ki khun, ki bahaïing hasem ki bym dei ki nongdie madan ruh ki ïoh lang”.
Namarkata, kitei ki longkmie ki la kynnoh ruh ba dei hi ka Sorkar ba leh, ha kaba kiba dei hok ban ïoh ki dukan kim ïoh hynrei ki bym dei hok ban ïoh pat ki ïoh dukan ha MUDA.
