Shillong, Jymmang 11
Ka Hills State People’s Democratic Party (HSPDP) Youth Wing lyngba u Samla Pynshai Joel Dkhar uba dei u Secretary ka HSPDP sengkmie, ha ka 11 tarik u Jymmang 2026, u la ai khublei ïa u Myntri Rangbah ka Jylla, u Conrad K Sangma ba u la shimkhia ha kaba ïadei bad ka jingpynbeit ïa u pud u sam.
Haba kren sha ki lad pathai khubor u Samla Pynshai u la ong ba ïa ki jaka khappud kiba dang sah, na ka liang u Myntri Rangbah u la kular ban sa pynbeit ïa ka jingïakren hadien ka ilekshon hapoh ka Jylla Assam.
“Ngi kyrmen ba ka jingïakren ka kham suk, namar hapoh Jylla Assam ka la wan biang kajuh ka Sorkar,” u la ong.
U Samla Pynshai u la ong ruh ba kim kwah shuh ïa kino-kino ki jingjia ba sngewsih ha Langpih. Kumta na ka liang ka HSPDP, ka la kyrpad na u Myntri Rangbah ba kumba u shimkhia ha ka wat kaba nyngkong, kyrmen ba kan pynbeit noh ïa kine ki jaka kiba dang sah.
“Long katba long, ka Sorkar kadei ban leh kham sted ïa kane ka kam bad kidei ban pyndep noh shisyndon, namar kumba ngi tip ba haduh 4 ngut ki mynsiem ki la duh bad ka snam ka la phlei ha Langpih, ngim kwah shuh da lei-lei ban dangwan jia biang kum kine ki jingjia,” la bynrap biang u Samla Pynshai.
