Shillong, Jymmang 11
Ka Meghalaya ka la kyrpad na bynta ka jingpynbeit tarik bathymmai na ka bynta ka jingwan plie u Myntri Rangbahduh ka ri, u Narendra Modi ïa ka Shillong Medical College (SMC), ha kaba u Myntri ka tnad ka koit ka khiah, Bah Wailadmiki Shylla u la ong ba ka Jylla ka kwah ïa ka jingplie paidbah ban long mynta u snem khamtam ba la sdang ïa ki klas jong ka samoi pule banyngkong ka MBBS.
“Ka dei ka jingangnud jong ki paidbah ka Meghalaya ban don la ka jong ka Medical College. Ka dei ka jingjop kaba khraw ïa ka Jylla, kumta ngi kwah ba u Myntri Rangbahduh un plie ïa kane,” la ong u Bah Wailad ha ka Lah Sngi U Blei.
U Myntri u la kdew ruh ba ar tylli ki tarik kiba la pynbeit hashuwa kim shym la urlong.
“Ha ki por ba la dep ruh, ha ki ar tylli ki khep, u la ai ar tylli ki tarik hynrei namar ki daw ki bym lah kiar, um shym la lah ban wan,” u la ong.
“Kumta, ha kane ka kynti ruh, ngi dang ap ba baroh ki ilekshon kin kut noh bad mynta sa shisien pat, ngin sa kynjoh ktien biang na bynta ka tarik,” u la ong.
Katba ka rai kaba khatduh ka shong ha ka ophis jong u Myntri Rangbahduh, u Bah Wailad u la ong ba ka Jylla ka kwah ban ïaid sted haba ïadei bad kane ka kam.
“Ngi kwah ban leh noh kloi katba lah namarba ki klas ki la sdang na ka bynta ka samoi pule banyngkong,” u la ong.
Ka National Medical Commission ka la pyllait 50 tylli ki ‘seat’ MBBS na ka bynta ka ‘Batch’ kaba sdang.
“Ka Medical Council ka la wan bad peit bniah kumba dei bad ai jingbit. Ïa mynta, ngi la ïoh jingbit na ka bynta 50 ngut ki samla pule,” u la ong.
Halor ka Tura Medical College, u Bah Wailad u la ong ba ka Sorkar ha kaba sdang, ka la jied ïa ka lynti jong ka ‘Public-Private Partnership’ (PPP) namar ka jingduna ki nonghikai.
“Wat ban ïoh ïa ki nonghikai na ka bynta 50 ngut ki samla pule ruh ka long kaba eh bha. Na ka bynta ka Tura ka long 150 ngut, dei na kata ka daw ba ngi la jied ïa ka lynti jong ka PPP,” u la batai.
Hynrei ka jingsngew ka la kylla shisien ba ka Shillong Medical College ka la sdang kum ka jaka pule Sorkar.
“Hadien kane, ki briew ki la ïohi ba ka Shillong Medical College ka la sdang kum ka jaka pule Sorkar, ki kwah ruh ba ka Tura kan long ka Medical College ba la pynïaid da ka Sorkar,” u la ong.
“Ngi la pyrshang ban pynshai hynrei ki briew ki dang kwah hi ïa ka kum ka ‘Medical College’ jong ka Sorkar. Naba ngi ngeit ba ka dei na ka bynta ki paidbah, ngi pyrkhat ba ngin pyrshang bad ngi la rai ba kan dei ka ‘Medical College’ jong ka Sorkar,” la ong u Bah Wailad.
Ka jingpynrung kam ka dang ïaid shakhmat.
“Ngi la phah ïa ki jingpynbna na ka bynta ki nonghikai bad ki Professor na ka bynta ka ‘Tura Medical College’,” u la ong.
Ka thong ka long ban pdiang ïa ki samla pule naduh ka samoi pule ban wan, katkum ka jingpynrung kam.
“Ka Sorkar ka thmu ban pyntreikam ïa ka ha kane ka aïom ban wan”, u la bynrap.
Haba kren halor ki jingtei, u Bah Wailad u la ong ba la dep ban ai katto-katne tylli ki ‘tender’ na ka bynta ka Shillong Medical College, kynthup ïa ka Madan ïalehkai bad kiwei-kiwei ki jingdonkam ba kyrkieh.
“Ki don katto-katne ki ‘tender’ kiba la khot namar ngi tip ba ka dei ka projek kaba heh, donkam shibun ki jingtei,” u la ong.
Ka jaka kaba kham heh ka dang don ha ka jingpynkhreh.
“Mardor ngi donkam ïa ka ïingmala kaba heh, ka projek kaba heh,” u la ong bad bynrap ba ka tnad ka la khot ïa ka ‘Expression of Interest’ ha u bnai ba la dep ban pynkhreh ïa ka Detailed Project Report.
“U Myntri Rangbah ka Jylla u la pyntikna ïa nga ban pynïoh kloi katba lah ïa ka DPR. Lehse ngim lah ban leh tang shisien leh hynrei ngin leh ha ka rukom jong ki kylla namarba ngi donkam ïa ki jingtei kiba heh,” la ong u Bah Wailad.
Ïa mynta, ka jingpynleit jingmut ka long halor ka ‘Building Capacity’ ha jaka jong ki tiar ki tar kiba rem dor.
“Haba kren shaphang ka jingdon ïa ka jingsumar da ki ‘Robot’ bad kiwei-kiwei, mynta kaba kongsan ka long ba ngi ai ïa ka jingnang-jingstad, ngi ai ïa kata ka lad ka lynti sha ki doktor , ki Professor, bad ki samla pule jong ngi,” u la ong.
La buh bynta ïa ka pisa na ka bynta ki jingïalang bad ki jingai jinghikai ban ai ïa ki jingtip sha ki nonghikai halor ki kor ki bor teknoliji kiba thymmai.
“Ban leh ïa ka jingsumar da ki ‘Robot’, nga tharai ba kan dang shim por,” u la bynrap.
U Bah Wailad u la pyntikna ba ka Shillong Civil Hospital ka dei ka Hospital hikai na ka bynta kane ka Medical College.
“Baroh ki Medical College ki hap ban ïateh bad kawei ka Hospital. Khatduh, ki hap ban wan leh ‘Practical’ tang ha kata hi ka Hospital,” u la ong.
“Lada phi leit, phin ïohi ba la thoh Shillong Medical College Hospital,” u la ong.
Ka don ruh ka jingthmu ban pynheh hynrei la khanglad namar ka jingduna jaka.
“Ngi dang thmu ban pynheh ïa ka hynrei, kumba phi tip, ka la treikam lypa, kumta ka long kaba eh bha haba kheiñ ïa ka jaka,” u la ong.
Ïa ka jaka ban pynheh la ïoh lyngba ka Red Cross Meghalaya.
“U Myntri Rangbah ka Jylla ha ka sien ba la dep u la leit jngoh ïa kane ka Centre bad ki la mynjur ban ai ïa ka jaka na ka bynta ka Shillong Civil Hospital ban pynheh,” la ong u Bah Wailad.
“Ngi la dep ban pynkhreh ïa ka DPR bad shen bha ngin sa pynmih ïa ka ‘tender’. Yn ai jaka sha ka Shillong Civil Hospital ban pynheh shuh-shuh,” u la ong.
