Khliehriat, Jymmang 12
Ki pulit ka East Jaiñtia Hills ki la kyrpad ïa ka jingïarap jong ki paidbah khnang ban lah ban ithuh ïa ka metïap jong uwei u shynrang briew kaba la ïoh sei na ka krem dewïong kaba la iehshrah ha ka shnong Mulait Bri-Sumer ha ka taïew ba la dep.
U Superintendent of Police ka District, u Pankaj Rasgania ha ka 12 tarik Jymmang u la ong ba ïa kane ka metïap kaba la kem pyut la buh hapoh ka jaka buh metïap jong ka Civil Hospital, Khliehriat na ka bynta ka jingpynithuh bad jingwan shimti da ki bahaïing hasem.
“La kyrpad ïa ki paidbah ba kin wan shakhmat ban ai kino-kino ki jingtip lada ki don ha kaba ïadei bad kane ka metïap, lane shaphang ki bahaïing hasem jong u,” ong u SP.
Ïa kane ka metïap la ïohi hadien ba ka la per hapoh kawei ka krem dewïong kaba don um ha ka 9 tarik Jymmang.
“Ha ka 9 tarik Jymmang ha ka por kumba 1:50 mynsngi la ïoh jingtip lyngba ka ‘phone’ na u Rangbah Shnong ka Mulait Bri-Sumer ba ki la don kiba ïohi ïa ka metïap jong u shynrang bym lah ban ithuh kaba per hapoh ka krem dewïong ha Mulait Bri-Sumer,” ong u SP.
Ki pulit na Moorïap BOP ki la wan poi mardor sha katei ka jaka bad lap ïa katei ka metïap kaba la per hapoh katei ka par dewïong kaba jylliew kumba 50 phut, bad da ka jingïarap ka kynhun na ka SDRF la lah ban sei noh ïa kane ka metïap na kane ka par dewïong.
“Hadien ba la pyndep ïa ki jingdonkam baroh katkum ka aiñ, ïa kane ka metïap la pynkynriah noh sha Civil Hospital, Khliehriat ban pyntikna ïa ka daw jong ka jingïap,” ong u heh pulit.
Ki pulit ki la ong ba ïa utei u briew ym pat lah ban ithuh namar ka met ka la pyut palat, bad la kyntu ïa kino-kino kiba don jingtip ha kaba ïadei bad une u briew ne shaphang ki bahaïing hasem jong u ba kin sngewbha ban pyntip mar-mar sha ki pulit ka East Jaiñtia Hills. Ka jingtohkit halor kane ka dang ïaid shakhmat.
