Shillong, Jymmang 12
Ka Directorate of School Education & Literacy (DSEL), ka Sorkar Jylla, ha ka 12 tarik u Jymmang 2026, ka la pynlong ïa ka Rajya Stariya Bal Vaigyanik Pradarshani 2025-2026, lane ka State Level Science, Mathematics, and Environment Exhibition for Children, kaba lai sngi, halor ka phang, ‘STEM for Vikasit and Atmanirbhar Bharat, ha Meghalaya Scouts and Guides State Headquarter, Shillong.
Ka jingpynlong ka Directorate of School Education & Literacy (DSEL), ka Sorkar Jylla ïa kane ka prokram, ka long kum shi bynta ban ai mynsiem ïa ki samla pule kiba don ïa ki sap ki phong, ban shna jingshna, ki ban pynmyntoi ha ka imlang sahlang.
Ïa kane ka ‘exhibition’ kaba la sdang ha ka 10 tarik Jymmang, 2026, bad kaba la pynkut noh ha ka 12 tarik Jymmang, 2026, la wan ban ïashim bynta da u Bah Lahkmen Rymbui, Myntri ba dei khmih ïa ka tnad pule puthi ka Sorkar Jylla uba long kum u kongsan ha kane ka sngi kut, ha ryngkat ka jingïadonlang bad u Bah Banteilang J. Kharshandi, MCS, Director ka DSEL, ka Kong M. Kharlyngdoh, Special Officer (Science) ka DSEL, ki khynnah skul, ki nonghikai, bad kiwei-kiwei.
Ki skul kiba la ïashim bynta ha kane ka ‘exhibition’ ki don kumba 34 tylli ei-ei, kiba na ki District bapher-bapher bad ha kane ka sngi, la sam ruh ïa ki khusnam sha ki khynnah skul kiba la long ki nongjop ha katei ka ‘exhibition’.
Haba ai jingkren ha katei ka jingïalang, u Bah Lahkmen Rymbui, u la ong ba watla ki samla ki don ïa kiba bun ki jingthmu, hynrei khlem da don pat ïa ka jingshlur kin ym lah ban pynurlong ïa ka jingthmu kaba ki don bad kumta kidei ban long ki briew kiba shlur ha kano-kano ka kam ba ki mut.
U la ong ruh ban pynlong ïa ka Ri kum ka Ri kaba la ïaid shakhmat ha kiba bun ki liang, ka donkam ïa ki samla pule ban long kiba shlur.
Namarkata, u Myntri u la pynshai ba ka Sorkar India bad kumjuh ruh ka Sorkar Jylla, ka ïatreilang ban ailad ïa ki samla ban leh ïa kaei kaba ki thrang ha ka jingim.
U la ong ruh ba donkam ka jingshlur ban pynurlong ïa ka Ri, kum ka ‘Viksit Bharat’.
Ha kane ka ngi kut, la ïoh ruh ka jingkren na u Bah Banteilang J. Kharshandi, MCS, kawei na ki khynnah pule, ka Pringnisa R Marak, PASCHAL Secondary School Resebul, Tura North Garo Hills bad kiwei-kiwei de.
