Shillong, Jymmang 12
U Chief Electoral Officer (CEO) ka Meghalaya, u Dr. B.D.R. Tiwari ha ka Sngi Ba-ar u la ong ba ïa ka ilekshon shiteng samoi sha ka Shillong Lok Sabha dei ban pynlong hapoh 6 bnai hadien ka jingkhlad noh u MP, bad ka tnad ilekshon ka la pynkhreh pura ban ïaid shakhmat bad kane ka kam.
“Kumba ka long, katkum ka jingbthah, ka dei ban long hapoh 6 bnai hadien ka jingkhlad noh u MP ka Shillong Parliamentary konstitwe-nsi,” la ong u Tiwari ha ki nongthoh khubor haba kylli ïa ka por kaba la pynbeit haba ïadei bad kane.
“Ngi la pynkhreh pura ban pynlong ïa ka ilekshon shiteng samoi,” u la bynrap.
Kumban shu kdew hangne, u MP ka Shillong, u Dr. Ricky A.J. Syngkon jong ka Voice of the People Party (VPP) u la khlad noh ha ka 19 tarik Rymphang, 2026.
Haduh mynta, ki don 2 tylli ki seng kiba la pynbna kyrtong ban ïakhun na bynta kane ka ilekshon shiteng samoi. Na ka liang ka National People’s Party (NPP) kaba synshar ïa ka Jylla kan pynïeng da u President ka KAS, Dr. D.R.L. Nonglait, katba ka VPP – ka Liang Pyrshah ka la pynbna ïa ka kyrteng jong u Dr. Batskhem Myrboh kum u kyrtong ba pura jong ka.
Ha kaba ïadei bad ka ilekshon Rajya Sabha, u CEO u la ong ba ka jingthep ‘vote’ kan sa long hashuwa ban thylli ka shuki.
“Katkum ka por ba la ai, shen hashuwa ba ka shuki kan thylli, nga khmih lynti ha kano-kano ka por ha u bnai Jylliew,” la ong u Tiwari.
