Shillong, Jymmang 12
Haba ñiew ïa ka surok ‘High-Speed Corridor’ kaba la tyrwa kum ka “jingkyrkhu” na ka bynta ka thaiñ, u Myntri Sorkar barim bad MLA ka UDP na Khliehriat, u Bah Kyrmen Shylla ha ka Lah Sngi u Blei u la ong ba kane ka projek kan pynsuk ïa ka leit ka wan, kan khate ïa ka por jong ka leit ka wan, bad pynduna ruh ïa ka jingdheng kali ha kylleng ka East Jaiñtia Hills bad shabar kumjuh.
“Haba phai sha ka surok ‘High-Speed Corridor’, kane kam dei tang ïa ka East Jaiñtia Hills marwei, ka dei na bynta ka ri hi baroh kawei,” la ong u Bah Kyrmen haba kren sha ki nongthoh khubor.
“Ka jingdon ïa kane ka ‘High-Speed Corridor’ kaba ïaid lyngba ïa ka East Jaiñtia Hills ka long ka jingkyrkhu ïa ki briew jong nga bad ïa ki paidbah ka Ri-lum Jaiñtia. La hangno-hangno ba kane ka projek ka ïaid lyngba, ka long ka jingkyrkhu ïa baroh kito ki thaiñ namarba kane kan pynsuk ïa ka leit ka wan, kan khate ïa ka por leit jingleit, bad khamtam eh kan wanrah shibun ki jingkylla,” u la ong.
U Bah Kyrmen u la kdew ïa ki jingduna jong ka lynti surok kaba la don lypa.
“Ka surok kaba mynta ka long kaba rit bad kaba khim bha. Da kaba don ïa kane ka ‘High-Speed Corridor’, kan pynduna ïa ka jingdheng kali. Na ka bynta ki nongleit nongwan kiba wan sha Shillong bad sha Ri-lum Jaiñtia, kan long kaba suk bad kaba sted bha,” u la ong.
“Kata kan long ka jingnoh synñiang kaba khraw,” u la ong.
Halor ka jingshim jaka, u MLA u la ong ba ka Sorkar ka shimkhia ban ïada ïa ki hok jong ki nongshong shnong.
“Haba ïadei bad ka jingsiew bai lutksan ïa ka jaka bad baroh, kata ka dei ka jingkular jong ka tnad bad ka Sorkar ba ym dei ban knieh ïa ki hok jong ki paidbah. Ki hap ban ïoh ïa baroh ka pisa kaba dei ka jong ki,” u la ong.
U la pynpaw ïa ka jingkyrmen skhem ha ka jingkhmih jong ki bor distrik ïa kane ka kam.
“Ka hap ban long kaba dei. Ngi don ïa u Deputy Commissioner uba trei shitom bha, bad ki DC ha ki jaka bapher-bapher ki la leh bha ïa ka kam jong ki. Nga ngeit ba yn leh ha ka rukom kaba biang bad kiei-kiei ki lah ban sted,” la ong u Bah Kyrmen.
