Shillong, Jymmang 12
U Myntri ba khmih ïa ka tnad pule puthi ka Sorkar Jylla, u Bah Lahkmen Rymbui u la ong, ba ïa ka jingphah kheiñ census ha ki nonghikai, la leh naduh ki por ba mynshuwa naduh ka por ba synshar ki phareng.
Haba kren sha ki lad pathai khubor, ha ka sngi Ba-ar jong ka taïew, u Bah Lahkmen u ong, ba ha ka jingpeit jong ka ri India naduh ki por phareng ruh haduh mynta ka ïaid beit kumne.
“Ka census ka long kaba donkam tam, kumta ka Sorkar kam lah ban phah da kiwei, hynrei ka hap phah hi da ki nongtrei Sorkar,” u la ong.
Lah ban kdew ba hadien ba la pynbna ka Sorkar Jylla halor ka jingphah kheiñ census ïa ki nonghikai, ka la mih shibun ka jingshah kynthoh ha ki paidbah, ban buh jingkylli ba kumno ka Sorkar ka phah kheiñ census ha ki nonghikai, kiba dei hok ban rung sha ki kamra klas.
U Bah Lahkmen u ong “Kane kam dei tang ka jingjia hapoh Meghalaya, hynrei kadei ha baroh ka Ri India. ka census bad ka ilekshon kidei kiba donkam tam bad ka Sorkar kam lah ban phah da kino-kino ki briew bad ka hap ban phah da ki nongtrei Sorkar”.
“Ngi la ïakren kaei ban sa leh bad ngin sa peit hadien,” u la bynrap.
