Shillong, Jymmang 12
U Myntri Rangbah ka Jylla u Conrad K Sangma, ha ka sngi Nyngkong u la plie paidbah ïa ka SaiLum, ka karkhana shna ksai ryndia (Eri) ha Bhoirymbong, Ri Bhoi district, kum ka sienjam ban pynkhlaiñ ïa ka ïoh ka kot jong ka kam pynmih ksai ryndia bad kyrshan ïa ki nongthaiñ jaiñ bad nongri khñiang na ka thaiñ.
Haba khot ïa ka Ri Bhoi kum ka dohnud jong ka kam pynmih ksai ryndia nala tynrai ha Meghalaya, u Conrad u la ong ba ka district ka la ïashim bynta kaba khraw ban pynlong ïa ka Meghalaya kum ka nongpynmih ‘sop khñiang ryndia’ kaba wan ba-ar na kiba pynmih bun eh ha ka pyrthei.
U la kdew ba u ksai ñiang ryndia, uba la tip ruh kum u Ahimsa silk, ka ïasoh jan bha bad ka kolshor, ka pateng, bad ka kamai kajih jong ki jaidbynriew ha kylleng ka Jylla.
U Myntri Rangbah u la ong ba ka jingseng ïa ka SaiLum kan ïarap ban pynkhlaiñ ïa ka rukom treikam ha ka jingpynmih ïa u ksai ryndia ha Meghalaya da kaba pynthikna ïa ka jingkyrshan kaba kham bha ïa ki nongri ‘khñiang ryndia’ bad ban pynbha ïa ka lad ban ïoh ïa u ksai uba bha bad uba jem dor na ka bynta ki nongthaiñ jaiñ.
“Ka Ri Bhoi ka la long la slem bha ka jaka pdeng jong ka jingpynmih ïa u ksai ryndia nala tynrai ka Jylla. Ka jingseng ïa ka SaiLum kan pynkhlaiñ ïa kane ka nam haba pynkupbor ïa ki nongri khñiang bad ki nongthaiñ jaiñ ha kylleng ka thaiñ,” ong u Conrad.
Haba kdew ïa ka jinglong kongsan bha ka jaka ba don ka Bhoirymbong, u la ong ba ka jingdon ka Bhoirymbong marjan bad ka Kad Liengsuiñ Umroi ka lah ban plie ïa ki ïew kiba thymmai na ka bynta ki mar ba pynmih na ki ksai ryndia bad nang pynkhlaiñ ruh ïa ki lad pynïasoh ha ka khaïi ka pateng bad ka jingshalan ïa ki mar.
Ha kane ka prokram, u Myntri Rangbah u la aiti ruh ïa ka song pisa kaba T.35 lak hapoh ka PRIME Meghalaya scheme ban kyrshan ïa kane ka sienjam.
Ka Sorkar ka la buh jingthmu ruh ban kyntiew ïa ka jingpynmih ksai ryndia bad ban pynmih mar na une u ksai kum shi bynta jong ki jingpyrshang ban kyntiew ïa ka kamai kajih ha nongkyndong, ka jingseng kam, bad ki karkhana thaiñ jaiñ nala tynrai ha Meghalaya.
