Nongstoiñ, Jymmang 12
Iwei i khyllung i la lait im na ka jingngam jyllop ha kawei na ki jaka saitjaiñ (Check Dam) ïa kaba la tip kum ka “Lawkohlong” kaba hap ha ka Shnong Domkohsam, West Khasi Hills District khappud bad ka Shnong Nongsohpian hadien ba ki 2 ngut ki heprit khlem ka jingtieng hynrei da ka jingshlur ki la leit ban sei ïa ka met jong i kaba la per ha sla jong ka um.
Ine i khyllung iba la lait im na ka jingngam jyllop, i dei iba dang 1 snem 10 bnai bad i dei i khun ba 6 jong ka Kong Albamery Syiemlieh bad u Bah Eljinius Nongsiej na ka Shnong Nongkohsam.
Ki 2 ngut ki heprit kiba la ïoh ban pyllait im ïa ine i khyllung ki kynthup ïa u Danialborn Nongsiej -14 snem bad u Robertjohn Nongsiej -10 snem kiba dei shipara ar kmie na ka shnong Nongsohpian. Haba kren bad u nongthoh khubor halor kane ka jingjia, ki la ïathuh ba katei ka jingjia ka la jia ha ka step jong ka sngi 11 tarik u bnai Jymmang, 2026 ha ki por 11 baje mynstep.
U heprit Danielborn bad u heprit Robertjohn ki la ong ruh ba katba ki dang wan phai na ka Shnong Sylleiiawkhein, West Khasi Hills bad ïaid lynti, hamar ba poi ha katei ka jaka (Check Dam) ki la ïohi ba ka don kaei-re-kaei kaba i kum ka jaiñ ne kum u khun bynriew ba per ha sla jong ka um, bad ha ka jingbym poi pyrkhat bad wat ha ka jingtieng, ki la leit sha katei ka um hynrei ki lap pynban ba u dei i khyllung, bad ki la sei ïa itei i khyllung sharud jong katei ka wah.
Shuh shuh hadien kane, kine ki 2 ngut ki heprit ki la ïoh ban sei ïa itei i khyllung , ka meiduh jong itei i khyllung kaba dang don ha la ïing kham pajih na katei ka jaka saitjaiñ lane ‘Check Dam’ ka la ïohi bad ka la pyrta ïa i kmie jong ka, iba dang thmu ban leit rah um, iba dei ruh i mei-ieid jong itei i khyllung.
Kumta i mei-ieid ruh mar-mar i la leit sha katei ka jaka bad mar ïa poi i la shim ïa i khyllung bad pynkhih bad khem na ka kpoh jong i bad hadien katto-katne por, ine i khyllung in sa khie peit biang ïa la ki khmat ki jong i.
Nangta, hadien kane da ka jingïa ïam briew ha katei ka jaka, la wan poi sa ka kmie jong ine i khyllung bad ki la pynloit noh ïa ki jaiñ phong bad ki la pynklum ruh da ki jaiñ bad kin sa rah noh sha la ïing, hynrei kaba sngewtynnad ka long ba ine i khyllung mynta i don hapdeng ka jingshait ka jingkhlaiñ.
Na ka liang ka Kmie jong i khyllung, ka Kong Albamery Syiemlieh haba kren bad u nongthoh khubor haba batai balei ba itei i khyllung i leit poi sha katei ka jaka saitjaiñ, ka la ong ba ka lah ban dei ba itei i khyllung i bud ïa ka, ha ka por ba ka leit sha kper hynrei la shu antad ba i la kum ur ha katei ka jaka bad hap sha katei ka jaka saitjaiñ.
Shuh shuh ka la pynpaw ïa ka jingsngewnguh shi kat dei eh ïa kitei ki 2 ngut ki heprit kiba lap bad ïoh ban pyllait im ïa i khun jong ka , ha kaba ka la ong ba u Blei un don lem don ryngkat bad kine ki 2 ngut ba kin nang ïoh ïa ka met kaba koit kaba khiah.
Halor kane ka jingjia, ha ka step jong ka 12 tarik u bnai Jymmang, na ka liang ka Shnong Nongsohpian, West Khasi Hills ha ka jingïalam jong u Sordar Shnong, u Bah Sirian Wahlang ha ryngkat ka jingdonlang ki dkhot ka EC jong ka Shnong, ki bahaïing hasem jong kitei ki heprit, ki Kmie ki kpa jong itei i khyllung ki bahaïing hasem ki la ïoh ban pynlong ïa ka jingïalang ba lyngkot ban ai burom ïa kitei ki heprit.
