Shillong, Jymmang 12
Ka seng jong ki nongtrei bym dei ki nonghikai ka North Eastern Hill University Non-Teaching Staff Association ka la thoh sha u Secretary ka tnad pule puthi jong ka Sorkar Jylla, da kaba pynpaw ïa ka jingsngewkhia kaba jur halor ki jingeh kiba dang ïai bteng kiba ktah ïa ka skulbah NEHU bad pan jingïarap ban tuklar lem haba ïadei bad u Vice-Chancellor u Prof PS Shukla.
Ha ka jingpyllait khubor, ka NEHUNSA ka la ong ba ka rukom treikam ha katei ka skulbah “ka la shah pynthut jur, kaba la ktah jur ïa ki kam ba man ka sngi.”
Ka seng ka la pynshong nongrim ïa ka jinghiar khamtam eh ha ka jingduna ki nongtrei. “Mynta, ïa ka skulbah la pyntreikam tang da ki 186 ngut ki nongtrei ba man ka por ki bym dei ki nonghikai na ka jingkhlaiñ ba la mynjur kaba long 526 ngut ha baroh ki kyrdan,” la ong ka kyrwoh.
Katba ka kdew ban pynneh ïa ka jingshong suk shongsaiñ ka dei da ka jingïarap jong ki nongtrei ba shipor, ka NEHUNSA ka la buh jingeh namar ka jingkiew jong ki nongtrei ba la shongthait.”
Ka kyrwoh ka la kynnoh shuh shuh ba “la kyntait khlem nongrim ïa ki jingkiew kyrdan na ka bynta ki nongtrei kiba dei hok.”
Ka NEHUNSA ka la ong ba ka la ïasaid na ka bynta ban thung kloi ïa ki nongtrei bym dei ki nonghikai la katto katne snem, hynrei ïa ki jingkyrpad ba dei hok ym shym la pynbeit da u Prof PS Shukla, Vice-Chancellor ka NEHU.
Ka seng ka la pynpaw ruh ïa ka jingbym don u VC na ka ophis treikam jong u ha nongbah Shillong. Nalor kata, ïa ka jingbym don ha jaka pule jong u ha Shillong (ka jaka pule) la shim ba ka dei ka jingbymlah ban pynbiang ïa ki jingdonkam jong ka NEHU.
La ong ba ha u bnai Nohprah 2024, u la pynkynriah noh shi syndon ïa ka ophis jong u sha kawei pat ka Jylla kaba jngai 100 kilomitar na ka jaka treikam jong u, kaba u kam ba ka dei ka ophis camp jong u”, la ong ka NEHUNSA. “Hynrei kane ka jingpynbeit kam ïahap bad ki aiñ jong ka Skulbah jong ngi bad ka i kumba la shna na ka bynta ka jingsuk jong u, kaba pynjngai ïa u na ka jingïohi bad ka jingkitkhlieh kaba donkam da ki nongtrei jong ka NEHU,” ka la bynrap.
Ka seng ka la pynpaw ba “ka skulbah ka treikam khlem u khlieh uba la ai bor ban shim rai na ka bynta ka jingbha jingmiat jong ka skulbah.”
“Kum une u Vice-Chancellor u dei uba pynsniew ïa ka jaka pule, kumba la pyni da ka jingktah kaba sniew ïa ka National Institutional Rankings Framework (NIRF) naduh ba u la shimti ïa ka kam”, la ong ka jingpynlait khubor.
“Lada u Prof PS Shukla u dang bteng kum u Vice-Chancellor, ngi sheptieng ïa ka jingma kaba dang ïai bteng ïa ki jingangnud ha ka pule puthi jong ki samla pule kiba wad ïa ki jingpule kiba kham shajrong ha ka skulbah jong ngi bad ki kolej ba ïasoh bad ka,” la bynrap shuh shuh ka seng
