Shillong, Jymmang 12
Ka jingkieng Umiam bypass ba dang shna thymmai ka Sorkar Jylla yn plie paidbah ha ka 13 tarik Jymmang ha kaba yn shah ban ïaid ki kali kamai kynthup ïa ki bos miet (Night super bus) na Umiam sha Shillong ban sdang naduh ka 14 tarik u Jymmang katkum ka hukum ba la pynmih da ka Deputy Commissioner ka East Khasi Hills kaba long mynta ka sngi.
Ka hukum ka ong, “Haba ïa ka jingshna ïa ka bypass jong ka jingkieng Umiam la dep bad yn plie paidbah ïa ka ha ka 13 tarik u Jymmang 2026, da kaba ailad ïa ka jingïaid jong baroh ki jait kali kamai kynthup ïa ki night super bus lyngba kane ka jingkieng na ka bynta ban ïaid na Umiam sha Shillong kan sdang naduh ka 14 tarik Jymmang 2026.”
Ka jingleit jingwan lyngba katei ka bypass kan don saw tylli ki kyndon, la ong ka hukum.
“Ïa ka jingïaid jong ki kali kamai kynthup ïa ki bos miet yn shah tang hapdeng ka por 9:00 mynmiet haduh 7:00 mynstep man ka sngi,” ka la ong.
Na ka bynta ki bos miet, la buh ïa ki kyndon ba dei ban pynïeng kali baroh shi miet ha ISBT Mawiong.
“Yn nym shah ban ïeng ki bos miet ha ki jaka ïeng kali jong ka SRGT, Polo, Shillong Municipal Board ha Dhankheti, harud surok Itshyrwat-New Shillong, surok Shillong-Jowai lane ha kano-kano ka jaka hapoh ka nongbah lait noh tang ha ISBT, Mawiong”, la bynrap shuh-shuh ka hukum.
Kumban shu pynkynmaw ka jingshna ïa kane ka jingkieng ba thymmai ka dei hadien ba ka jingkieng ba ju ïaid man ka por hajrong ka Umiam ka la sdang synjor naduh ba ka Sorkar ka la dep maramot.
Ka jingshna ïa kane ka jingkieng thymmai ka shim por kumba shi snem tam eiei naduh ba lasdang pynïeng paia hapdeng ka wah bad haduh ban da plie lashai ka sngi ka 13 tarik mynta u bnai Jymmang 2026.
