Shillong, Jymmang 12
Ka khun ksiew jong u Paiem Wickliffe Syiem, u Syiem ka Hima Nongstoiñ kaba la shong la sah ha Bangladesh ka la ïoh ban pyndep ïa ka jingpule Master of Science Information System na ka Central Michagan University, United State of America.
Kane ka khun ksiew jong u Paiem Wickliffe Syiem kaba la shong la sah mynta ha Sylhet, Bangladesh ka dei kaba la tip kyrteng kum ka Aitimon Sohlamar, kaba 30 snem ka rta kaba dei ka khun jong ka Kong Florence Sohlamar bad Daniel Dkhar.
Ka Kong Florence Sohlamar ka dei ka khun kynthei kaba lai na ki phra ngut ki khun jong u Paiem Wickliffe Syiem kiba la shong ba la sah ha Bangladesh.
Haba ïoh ban ïakren bad u Bah Andrew Sohlamar uba dei u Kñi jong ka samla Aitimon Sohlamar u la ïathuh ba ka Aitimon ka la pyndep ïa ka matrik na ka Sunamganj bad bteng ïa ka jingpule ha skulbah shimet ha Sylhet.
U la ïathuh ba ka la trei bun tylli ki jait kam bad khatduh ka trei kum ka Programme Manager ka World Vision ha Sylhet.
Shuh shuh u la ïathuh ba namar ka thrang ban pyntbit ïa ka jingpule ka la aplai ïa ka Visa bad ka la mih na Bangladesh ha ka 30 tarik Nailar, 2024 ban leit pule sha United State of America ban ïoh ïa ka risol ha ka 8 tarik mynta u bnai Jymmang ba ka la pyndep ïa ka master degree ha ka Science and Technology.
U Bah Andrew u la pyntip ba ki don ki jaka pule kum kane ka lain ha Dhaka hynrei ka Aitimon ka kwah ban leit sha America namar ka jinghikai ka la ïapher bak-ly-bak.
U la pynkynmaw ba u kpa jong u, u Paiem Wickliffe Syiem ruh u la leit pule sha London bad sha America mynta pat la bud dienjat da ka khun ksiew ka Aitimon.
U la ïathuh ba haduh mynta ki Khasi kiba sah ha Bangladesh, ka lah ban dei ka Aitimon kaba la pyndep ïa ka jingpule master degree na America bad u kyrmen ba kiwei kiwei ki samla Khasi na Bangladesh kin poi sha kyrdan shajrong.
