Shillong, Jymmang 12
Ka Sorkar Meghalaya ka la pynmih ïa ka hukum haba ïadei bad ka jingpynkynriah kam ha ka tnad pulit, ha kaba la pynkynriah kam ïa 14 ngut ki heh ophisar IPS bad MPS ha kylleng ka Jylla lyngba ka jingpynbna na u Principal Secretary (Home), Bah F.R. Kharkongor ha ka Sngi Ba-ar.
Ki hukum, kiba la pynmih katkum ki jingai jingmut jong ka Civil Services Board bad ka Police Establishment Board, kin treikam naduh ka sngi ba shimti ïa ka kam.
Ha ka kyrdan DIG, u Jerry Fisher K. Marak, IPS u la shah pynkynriah na Western Range, Tura sha Eastern Range, Shillong, katba u Vivekanand Singh, IPS, un kynriah noh na Eastern Range sha Western Range, Tura.
Napdeng ki Commandant jong ki Battalion, ïa u Siddharth Kumar Ambedkar, IPS, la pynkynriah noh na ka 5th MLP Battalion, Samanda ban khlieh ïa ka 6th MLP Battalion, Umran.
U ophisar uba don hashuwa jong u ha Umran, u Ashish, IPS, mynta un shimti kum u Superintendent of Police, VIS, Shillong.
Ha kawei ka liang, u Bah Stephen A. Rynjah, MPS uba la long u SP ka East Garo Hills un shimti noh kum u Commandant, 5th MLP Bn, Samanda.
Ha kajuh ka por, la pynbna ruh ïa katto-katne ki jingkylla ha ka kyrdan jong ka distrik.
U Shailendra Bamaniya, IPS u la shah pynkynriah noh kum u SP South Garo Hills, Baghmara bad un shimti kum u SP, CID, Shillong, katba u Ringrang T.G. Momin, MPS un shimti noh ïa ka Baghmara na ka CID.
Ïa u Pawar Swapnil Vasantrao, IPS, la pynkynriah noh na North Garo Hills sha East Garo Hills kum u SP, katba u Ishan Gupta, IPS, un kynriah noh na ka kam CM Security sha North Garo Hills. U Naman Kumar, IPS, mynta un khlieh ïa ka CM Security, Shillong.
Ha nongbah Shillong, la thung ïa u Dangsan Khyriem, MPS kum u SP City, ha ka jaka jong u Dewansh Pandey, IPS, u ban shimti noh kum u Assistant Inspector General of Police (Law & Order).
U Bah Geffry Waemhok Lyngdoh, MPS un kynriah noh kum u AIG (L&O) bad un shimti noh kum u SP, Eastern West Khasi Hills, Mairang. U Hari Prasant M.R, IPS, u la shah thung kum u SP (Traffic), East Khasi Hills.
Ka Sorkar ka la ong ba baroh kine ki jingpynkynriah kam la leh na ka bynta ka jingmyntoi jong ka jingshakri paidbah bad kan ïai treikam tad haduh ban da pynmih hukum da kumwei pat.
