Shillong, Jymmang 12
U Myntri Rangbah ka Jylla u Conrad K Sangma bad ki ar ngut ki Symbud Myntri Rangbah ka Jylla kata u Bah Prestone Tynsong bad Bah Sniawbhalang Dhar ki la ïoh ban sakhilang haba u Himanta Biswa Sarma u la bam smai kum u Myntri Rangbah ka Assam ha ka samoi treikam kaba ar sien ha Guwahati kaba la long mynta ka sngi ha ka jingïadonlang u Myntri Rangbahduh ka Ri, u Narendra Modi, u Amit Shah, Myntri Kam Pohïing jong ka Sorkar Pdeng, u Rajnath Singh, Myntri Kam Bar Ri bad u President ka seng BJP, u Nitin Nabin, ryngkat bad ki Myntri Rangbah bad ki Symbud Myntri Rangbah jong ki Jylla kiba don ha ka Sorkar synrop NDA.
Ka NPP kaba dei ka seng kaba ïalam ïa ka Sorkar MDA-2 ha Meghalaya ka dei kaba synroplang ha NDA ka Sorkar synrop jong ka Sorkar Pdeng.
Kane kan dei ka Sorkar NDA kaba lai ha Assam, bad u Sarma u la kylla long tang ma u hi u Myntri Rangbah ka Jylla Assam bym dei na ka Congress uba la lah ban pyndep ïa kane ka jingbam smai kaba ar sien.
Nalor u Sarma, ki don saw ngut ki MLA- arngut na ka seng BJP bad mar uwei na ki paralok jong ka ka Asom Gana Parishad (AGP) bad ka Bodoland People’s Front (BPF) ruh kiba la shim smai kum ki Myntri. Kine ki kynthup ïa u Rameswar Teli bad Ajanta Neog na BJP, u Atul Bora na AGP, u Charan Boro na BPF. U Myntri barim bad nongïalam ba rangbah ka BJP u Ranjeet Kumar Dass un long u kyrtong jong ka NDA na ka bynta ka shuki Lamphang ka ïingdorbar ka Jylla.
Ka jingïalang ka kynhun myntri kaba nyngkong eh jong ka Sorkar thymmai kan long tang hadien ba la dep pynsmai. U Sarma u la ong ba ka jingpyntreikam ïa ki jingkular jong ka Bharatiya Janata Party ha ka elekshon bad ka mat pynroi kan dang long ka jingthmu ba hakhmat eh jong ka Sorkar ha ka samoi treikam ba thymmai jong ka.
Ka NDA, kaba kynthup ïa ka BJP, AGP bad BPF, ka la ïoh ïa ka jingjop ha ka jingthep vote ha ka Ïingdorbar Thawaiñ, da kaba jop ïa ka rekod kaba 102 ngut ha ka Ïingdorbar kaba don 126 ngut ki dkhot. Ka BJP marwei ka la jop 82 ngut, kaba dei ka jingbun paid kaba nyngkong eh jong ka ha ka Jylla, katba ka AGP bad ka BPF ki la jop mar 10 ngut.
