Shillong, Jymmang 12
Ka Hynñiewtrep National Youth Front (HNYF) South East Circle ha ka 12 tarik u Jymmang 2026, ki la leit ban ïakynduh ïa u Chief Executive Member (CEM) ka KHADC, ban ïakren halor ki mat kiba ïadei bad ka dong ka thaiñ khamtam haba ïadei bad ka jingbteng ban treikam ka NESS Agency ha NIT Sohra.
Ka seng kam shym la ïoh ban ïakynduh ïa u CEM, namar ba u ong, ba u bunkam bad kim banse ban shu ai noh tang da ka jingthoh.
Haba kren sha ki lad pathai khubor, u nongaiktien ka HNYF, South East Circle, u Bah Banjop Khongwir u la ïathuh ba ka seng ka la kwah ban ïakynduh ïa u CEM la ar sien bad mynta ka sien kaba lai ruh u khlem ïakynduh ïa ki, da kaba aidaw ba u bunkam.
Ka seng kam sngewlah ban ap bad kam banse ban ai da ka jingujor sha u CEM ïa ka jingbym don Trading Licence bad khlem ka NOC jong kane ka Agency ka NESS, u la ong.
U la ong “Ha Ïingdorbar, ngi ïohi ba u CEM u la ong ba la black list ïa kane ka kompeni, hynrei ha ka jingïakynduh jong ka seng bad ki bor ba dei peit ïa ka NIT ki la ïoh ïa ka jubab, ba ki la ai tang ha ka NIT hynrei ha ka NESS kim shym la ïoh ïa kane ka jingpyntip ba la black list ïa ka.
“Ngi wan sha KHADC ban ïakynduh ban pan jingpynshai, hynrei kim shym la ïohlad satia, bad ka seng ka dawa na u CEM ba un pynshai da ka ‘official letter’ halor kane bad ba ki paidbah kin tip, namar kumba long mynta ka NESS ka dang trei kam hapoh ka NIT ha Sohra,” la ong u Bah Banjop.
Shuh shuh u la ïathuh ba ka seng ka la ïohi ba u CEM u la black list tang ha ki media bad ha Ïingdorbar, hynrei kumba ka paw kane ka Agency ka dang bteng ban trei. Ka seng ka pan jingpynshai ruh halor ka jingïoh ïa ka ‘stay order’ jong ka NESS kaba dang ïoh ban trei ha NIT, ka hearing ka la ïaid mynta kumba 4 sien, bad ha ka jingtip jong ka seng, ka KHADC ka khlem leit ban ïa shim bynta ha Ïingbishar ha kine ki sngi ba don ka hearing.
Kumta u la ong ba ka seng kan bteng ban dawa, halor kane namar ka ktah ïa ka riti ka dustur bad ïa ki bor synshar, namar lada ka KHADC kam ïaid katkum ki aiñ ki kanun, kam myntoi kata ka trade licence, kaba la ai da ka District Council.
