Shillong, Jymmang 12
Ka FKJGP Sohra Circle ka la leit ïakynduh ïa u Bah Winston Tony Lyngdoh uba dei u Chief Executive Member ka Khasi Hills Autonomous District Council ryngkat ka jingthoh ban pyntip ba ki trok na Assam, West Bengal ki la poi sha Majai ban kit mawshun hadien ba ki trok trai Jylla ki la sangeh namar ki hap pynbiang ïa ki kot ki sla katkum ka jingbthah ka ïingbishar.
Haba ïakren bad u Bah C.Kharmih u President ka FKJGP Sohra Circle u la ïathuh ba la ïoh jingujor na ki paradoh parasnam ba ki nongkhaïi bar jylla ki la wanrah da ki kali na Assam bad West Bengal ban kit mawshun na Majai hadien ba ki kali trai jylla ki la ïeng noh haba ki dang pynbiang ki kot ki sla.
U la ïathuh ba u CEM u la jubab, haba ïadei bad kine ki trok ka Council kam don bynta eiei namar ka dei ka kam jong ka Sorkar Jylla, kumta ka seng ka hap ban shong pyrkhat ban leit ïakynduh ïa ka tnad ka kit ka bah jong ka Jylla.
Ka seng ka la kyntu ïa u CEM ban buh biang ïa ka khyrdop ban talasi ïa ki kali na kiwei ki Jylla, hynrei u CEM u la ong ba u hap peit bniah ïa ka hukum ka ïingbishar, lada ka aiñ ka shah kin sa plie biang.
Katkum ka dorkhast ba la phah da ka seng FKJGP sha u CEM ka KHADC ka la kyrpad ban pynduh pyndam ïa ki laisen khaïi kiba dang treikam bad ban ym dei ban pynthymmai biang ïa ki nongkhaïi bar jylla la ka long ha kino-kino ki kam khaïi pateng kum ka khaïi mawshun sha Bangladesh, ki dukan die marbam mardih bad kiwei de.
Ka seng ka la dawa ruh ban nym ai laisen khaïi shuh ïa ki bar jylla na bynta ki kali kamai kum ki trok kiba leit kit mawshun ban shalan sha Bangladesh, nangta ki Sumo, ki taksi kiba kamai na Majai, Ichamati sha Shillong namar katkum ka jingïaid jong ka por kiba bun ki samla jong kane ka thaiñ ki la lah ban trei ïa kane ka kam.
Shuh shuh ka seng ka pynkynmaw ba ka Trading by Non-Tribal Regulation Act 1959 ka kren shai ruh pyrshah ïa ka kam Benami ne ka jingkhaïi jong ki bar jylla ha ka kyrteng ki trai jaka bad trai ri namar kane ka long be-aiñ, kumta ka seng ka ban jur ïa ka KHADC ban peit bniah ïa kane ka kam.
Na ka liang ka seng hadien ba la lap ba ka don ka shnat treikam jong ka KHADC ban peit kyrpang ïa ki kali kit mawshun kiba long trai da ki bar jylla na ka bynta ban peit ïa ki laisen khaïi hynrei kane ka shnat treikam kam shym la treikam kum ba la bynshet.
Kumta ka seng ka ban jur ïa u CEM ban bthah ïa kane ka shnat treikam ba kan shimkhia katkum ki aiñ bad ban ym ailad shuh ïa kitei ki kali kit mawshun ba kin kit ne khaïi mawshun lada ki trai kali kim dei ki Khasi.
Ka seng ka dawa ba nangne shakhmat kine ki kali ki dei ban don ki kot ki sla kiba long trai da ki khasi kum ki “registration certificate”.
Na ka liang ka seng ka la lap ruh ïa ka jingleh trai khlieh ha kine ki thaiñ da ki bar jylla ha kaba ïa ki kyrteng shnong ha kane ka thaiñ ki jer kyrteng da ki kyntien nongwei. Ha kajuh ka por la lap ba bun ki nongïalam shnong ha kine ki shnong ki dei ki bar jylla, kumta ka seng ka ban jur ïa ka KHADC ban pynkylla noh mardor ïa ki kyrteng Khasi bad ki nongïalam shnong kin dei ki Khasi.
