Shillong, Jymmang 13
U Myntri Rangbah ka Jylla Conrad K Sangma ha ka sngi Balang u la ong ba ka jingthaw ïa ki lad kamai jakpoh ka dang dei ka jingeh kaba khraw duh jong ka Jylla haba kdew ïa ka jingdon haduh 60,000 ngut ki samla kiba rung sha ka jylli treikam ha ka shisnem.
“Ka Meghalaya ka dei ka Jylla kaba dang samla, ha kaba kumba 50% jong ki nongshong shnong ki don hapoh ka rta ba 20 snem. Man la u snem, kumba 60,000 ngut ki samla ki rung ha ka jylli wad kam wad jam. Kane ka jingdon kan nang kiew shuh shuh ha ki snem ban wan. Kumta, ka jingpynmih ïa ki lad kamai jakpoh bad ki kam kiba neh ka long, bad kan dang ïai long, ka jingeh kaba kongsan tam na ka bynta jong ngi kum ka Sorkar,” u la ong.
U Conrad u la kren ïa kane ha ka Skillerate 2026 ba pynlong ha North Eastern Hill University, Shillong, ha kaba ula pynlait paidbah ïa saw tylli ki prokram ba thmu ban pynkhlaiñ ïa ka jingpynroi ïa ka sap treikam ki samla bad nang pynïar ïa ka lad ïohkam ïohjam bad sengkam sengjam jong ki samla ka Jylla.
Ha kaba pynshai ïa ka daw ha lyndet ba pynlong ïa ka Jylla ban wanrah ïa kane ka prokram ai jinghikai ïa ki sap treikam, u la ong ba ki prokram ka ri baroh kawei, wat la ki long kiba donkam, ki donkam ban pynbeit katkum ka jinglong ka jaka. “Ngi la lap ba ki jingdonkam jong ka Jylla, katto katne ki donkam ïa ki jingïarap kiba kham bniah bad ki prokram kiba la pynwandur kyrpang. Namar kata ngi la rai ban wanrah ïa la ka jong ka prokram hikai sap – kaba la kyrshan hi da ngi, kaba la shna katkum ki jingdonkam jong ngi, bad kaba lah ban pynkylla katkum ka jingdonkam,” u la ong.U la pynpaw ruh ïa ka bynta jong ki nongïatreilang ha ka roi ka par, da kaba ong ba kumba 50% jong ka pisa ka wan na ka project kaba ïoh jingkyrshan na bar kaba la kyrshan da ka Asian Development Bank (ADB).
Ha kaba jubab ïa ki jingsngewkhia halor kane ka jingïoh pisa, u la pynshai, “Kumba 80% jong kane ka pisa la siew biang da ka Sorkar India. Ka jingkit jong ka Jylla ka long kaba rit bha katba ki jingmyntoi ki long kiba khraw bad kiba lah ban ïohi”.
Ha kaba kdew ïa ki soh jong ka prokram, u la ong ba da ki hajar ngut ki samla ki la ïoh jingmyntoi. “Namar kine ki project kiba ïoh jingkyrshan nabar, da ki hajar ngut ki samla jong ngi kila ioh ia ki jinghikai pyntbit sap. Kine ki long ki soh kiba shisha, kiba paw – kiba pynkylla ïa ki jingim, kiba pynkha ïa ki lad, bad kiba plie ïa ka ïoh kam ïoh jam,” u la ong.
