Nongstoiñ, Jymmang 13
Ka ophis jong ka District Social Welfare Officer, West Khasi Hills District, ryngkat ka jingïatreilang bad ka DREAM Mission Meghalaya, ha ka sngi Balang ka la pynlong ïa ka jingïalang ïasyllok kaba kongsan bad ki bynta bapher-bapher jong ka district ban ïoh lum jingai jingmut bad jingtyrwa halor ki lad jingïarap ban pynduh pyndam ïa ka jingdih drok, kaba la kylla long ka jingma kaba jur ïa ka district bad ïa ka Jylla hi baroh kawei.
Ïa kane ka prokram la pynlong ha Bishop Hall jong ka shnong Tiehsaw. Ha kane ka sngi, kiba la ïa don bynta ki kynthup ïa u Bah F Kharshiing, Mission Director, DREAM Meghalaya, u Bah H Kharkongor, Superintendent of Police, West Khasi Hills District, u Isaac Momin, Assistant Commissioner, West Khasi Hills District, Kong D Pakyntein, District Social Welfare Officer, West Khasi Hills District, u Dr. R Marwein, u Rev. EW Marwein, ryngkat bad ki Rangbah Shnong, Nokma, NGO, VDP bad kiwei-kiwei ki bynta shnong. Lah ban kdew hangne ba ka jingthmu jong kane ka prokram ka long ban ïathir jingmut bad ba ïa ki jingeh, ki jingsngewkhia bad ki jingtyrwa jong ki shnong ki thaw kiba trei shitom ban rat dyngkhong ïa u drok, yn lah ban phah sha ka Sorkar ban bishar bniah bad ban pynkhlaiñ ïa ki jingïakhun pyrshah ïa ka jingdih drok ha ka district.
La pynlong ruh ïa ka jingïakren jingïatai paidbah ha kaba bun na ki nongkitkam shnong ki la shim bynta shitrhem bad ai jingmut kiba kordor, kynthup ïa ka jingdonkam ban don ki Detoxification Centre, ki Rehabilitation Centre, ki prokram jingïalap jingïapynsngewthuh paidbah, jingïarap jingïasyllok bad ka jingïashim bynta kaba khlaiñ jong ki paidbah ban ïakhun pyrshah ïa ka jingroi stet jong ka jingdih drok, ha kaba u Bah FG Kharshiing u la pynthikna ruh ba yn sa phah ïa baroh ki jingai jingmut bad jingtyrwa sha ka Sorkar ban bishar bniah.
Haba kren halor ka DREAM Mission, u Bah Kharshiing u la ong ba ka mission ka thmu ban pynlong ïa ka Meghalaya kum ka Jylla kaba lait na u drok ne ka “Drug Free Meghalaya” lyngba ka jingïatreilang bad jingïashim bynta jong ki shnong ki thaw.
U la ban jur ruh ba ka Sorkar Meghalaya ka ïai bteng ban ïakhun pyrshah ïa ka jingdih drok lyngba ki sienjam kiba ki paidbah bad kiba treikam bha ban ïada ïa ki samla na ki jingktah kiba sniew jong ka jingpyndonkam ïa ki jingdih ba sniew.
Shuh shuh u la ong ba ka Drug Reduction Elimination and Action Mission (DREAM) la pynshong nongrim ha ka jingngeit ba ki shnong ki thaw, ka kolshor bad ki samla ki dei ki bynta kiba kongsan tam ban tei ïa ka imlang sahlang kaba koit ba khiah bad kaba roi par.
U la ong ruh ba ka jingïakhun pyrshah ïa ka jingkyrni ha ki jingdih drok ka long kaba donkam ban ïada ïa ka imlang sahlang bad ban ailad ïa ki briew ba kin im ïa ka jingim kaba seisoh bad ban noh synñiang sha la ki shnong ki thaw.
Shuh shuh, u Bah Kharshiing u la ban jur ruh halor ka jingdonkam ban don ka jingsngewlem, jingïeit bad jingïarap ïa ki samla kiba shah ktah ha ka jingkyrni drok, da kaba kdew ba ka rehabilitation, jingïasyllok bad jingïatreilang jong ka imlang sahlang ki long kiba donkam ban ïarap ïa ki ban wanphai biang sha ka lynti kaba dei ha ka imlang sahlang.
Ha kane ka sngi la pynkut ïa ka jingïalang da ka jingkhot ïa baroh kiba ïadon bynta lang hapoh ka imlang sahlang ban ïa snohkti lang da ka jingïaishah, jingïatylli, jingïatreilang bad jingïashim bynta lang ban pynduh pyndam ïa u drok bad ban tei ïa ka lawei kaba kham shngaiñ bad kaba kham bha na ka bynta ki samla jong ka district bad ka Jylla hi baroh kawei.
