Shillong, Jymmang 13
Ki nongshong shnong ka Lapangap ki la ther tyngeh ïa ka Sorkar Jylla da kaba ong ba ki pulit kiba la buh da ka Sorkar Meghalaya hajan ka shnong Lapangap ki lapmiet tang ban ïa dih kyiad bad kim nud tang ban leit synran ïa ki nongrep sha ki lyngkha, hynrei ki shu shong ha ka jaka ba ka Sorkar ka la buh ïa ki bad ki ïa shu thiah bad dih kyiad man ka sngi. Haba ïakren ïa ki paidbah ba na ka thaiñ Lapangap kiba wan ba tur ha Secretariat ha ka sngi Balang ki la ong ba, “Ngi wan hangne ban dawa ban ïoh ïa ka hok khnang ba ngin ïoh trei suk trei saiñ, kumba ki trei suk hangne, ngi ruh ngi kwah ban ïoh ïa ka rep suk rep saiñ” la ong ki longkmie.
Ki la ong ba baroh shi katta ki la ïai ap ïa ka Sorkar ban ïa pynbeit noh ïa kane ka huri-hura hapdeng ka Sorkar Meghalaya bad Assam, hynrei ki la pynpaw ka jingsngewbitar ba sa katno shuh ba kin dang ap, ki la pynpaw ba ka jingïap thngan ka la ap ïa ki, namar ka jingbym ïoh jong ki ban leit trei leit ktah ha ki bri ki lyngkha ki jong ki.
U Waheh Shnong ka Lapangap u la ïathuh ba ka jingïakajia ki nongshong shnong ka Lapangap bad ki Karbi ka la sdang naduh u snem 2023, haduh mynta ka neh sah bad ki nongshong shnong ki don ha ka jingtieng jingsyier ban leit sha ki bri, ki lyngkha ki jong ki, namar ki Karbi bad ki pulit ka Assam ki dang pyntieng pynsmiej ïa ki nongshong shnong.
Shuh-shuh u la pynpaw ïa ka jingsngewkhia ba ki nongshong shnong ka Lapangap haduh mynta ruh kim pat ïoh ban leit puh, leit rep ïa ki lyngkha, ki pynthor ki jong ki namar ka jingpyntieng pynsmiej ki pulit Assam bad ki Karbi.
