Shillong, Jymmang 13
Ki nongshong shnong ka Lapangap, kaba hap ha Nartiang Konstitwensi ha West Jaiñtia Hills District ki la tur da ka bor ban poi hakhmat ka khyrdop jong ka Secretariat watla ki la shah khang ha ki pulit kiba la ap naduh u mot Kiang Nangbah kaba don hakhmat ka Civil Hospital Shillong.
Kane ka jingtur da ka bor ki paidbah ka shnong Lapangap ka dei ha ka por 3:00 baje mynsngi namar ki la bitar haba ki shah khang lynti ha ki pulit katba dang leit pynïeng kali ha madan Malki.
Kumta ki paidbah kiba la poi lypa ban ïakynduh hakhmat u mot Kiang Nangbah kiba la ïoh jingtip ïa kane, ki la leit shaw ïa ki na madan Malki bad mar shu pyllait ki pulit ki paidbah kynthei bad shynrang ha jingsynranlang ki dkhot ka Khasi Students’ Union bad Jaiñtia Students’ Union haba ki la poi ha u mot Kiang Nangbah kim sngap shuh ïa ki nongïalam shnong bad nongïalam sengbhalang hynrei ki la tur beit beit sha Secretariat.
La ïohi ba ki pulit ki la pyrshang ban khang lynti ïa ki paidbah hynrei kim shym la lah kumta ki la beh lang haduh ban da poi hakhmat IGP kaba don pyrshah ka khyrdop ban rung sha State Central Library ha kaba ki pulit ki la kham bun ki la ïeng ban khang lynti ïa ki paidbah. Katba ka jingïakhun hapdeng ki paidbah bad ki pulit ka la jur bha uwei na ki pulit u la synreit da ka lyer pynsat khmat kaba dei ka ‘Pepper Spray’ sha ki nongtur bad tied lathi ruh malu mala, ha kaba uwei u samla u la ngat ha ka jingmynsaw namar ba u la sat ki khmat bad dei ha kane ka por ki samla ki la tur jubor sha Secretariat khlem sngap shuh ïa ki pulit kiba la kah lynti ïa ki hakhmat ophis u SP.
Haba ki la poi hakhmat Secretariat, ka la kham jaijai hadien ba ka Sorkar ka la khot ïakren ban jied tang shiphew ngut ki nongïalam ban rung shapoh Secretariat.
Katba ki nongïalam shnong Lapangap bad ki nongïalam sengbhalang ki dang ïakren hapoh Secretariat, ki paidbah ki la ïeng mar shiliang ka surok ban pyrta pynrem ïa u Myntri Rangbah u Conrad K Sangma, ki Symbud Myntri Rangbah kata ïa u Bah Prestone Tynsong bad Bah Sniawbhalang Dhar bad ruh ïa ka Sorkar MDA namar kam lah ban ai jingïada ïa ki nongshong shnong ha khappud bad ka jylla Assam.
Ka jingtur ki paidbah ka shnong Lapangap ki la don palat 300 ngut kiba la mih na shnong ha ka por 6:00 baje mynstep bad poi sha Shillong haduh 2:00 baje nohphai sngi namar ka jingdheng kali haba ki wan da kumba san tylli ki bos. Haba kine ki bos ki la ïeng ha madan Malki ban lait khapngiah ka Shillong, ki pulit kiba la ap lypa ki la khang lynti ïa ki namar kim shah ban mih, kumta ki samla kiba la ap hakhmat Kiang Nangbah ki la bitar bad dei hangne ki la tur beit sha Secretariat watla pyrkhing jur ki pulit. Kane ka jingleit tur ki nongshong shnong Lapangap ka dei namar ka jingbitar haba kim ïoh lad shuh ban leit rep sha lyngkha lajong namar ka jingbym shah ki pulit Assam kiba la ap ha khappud kiba shong ba sah ki Karbi. Ïa kane ka jingleit tur sha Secretariat la ïalam da u Waheh Shnong ka Lapangap u Bah Deimonmi Lyngdoh.
