Shillong, Jymmang 14
U Myntri Rangbah ka Jylla Conrad K Sangma ha ka sngi Palei u la ong, ka jingïakren bad ka Assam halor ka phase-II jong ka jingïakren khappud ban pynbeit ïa ki hynriew tylli ki jaka ba dang don ha ka jingïakajia, kan sa long shen, hadien bala dep bam smai ka Sorkar thymmai ha Assam.
Haba jubab ïa ki jingkylli halor ka jingïaid ki kam ba ïadei bad ka jingïakren pynbeit pud, u Conrad u la ong, kane ka kam kan sa sdang biang hadien ka jingpynsangeh kaba neh katto katne bnai.
“Ka Sorkar thymmai kala bam smai ha Assam. Kumta, ai ba kan ïaid shuwa katto katne sngi. Ngan sa ïakren bad u Myntri Rangbah ka Assam bad khlem pep ngin sa pyntyllun shakhmat ïa ka jingïakren ha kine ki sngi ban wan,” ong u Conrad haba ïakren bad ki nongthoh khubor.
Ka jingïakren khappud jong ka wat kaba ar ka kynthup ïa hynriew tylli ki jaka ba dang don hapoh ka jingïakajia hapdeng ki ar jylla-ka Langpih, Borduar, Nongwah-Mawtamur, Desh Doomreah, Block I &II bad ka Psiar-Khanduli.
Ka jingïakren pynbeit pud jong ka wat ba nyngkong kala long ha u Lber 2022 ha kaba baroh ar Jylla kila ïasoi ïa ka Memorandum of Understanding ha New Delhi ha ka jingïadonlang u Myntri ka tnad Kam Pohïing ka Ri u Amit Shah, ban pynbeit noh ïa hynriew na ki 12 tylli ki jaka ba don jingïakajia pud.
Kane ka soskular ka kynthup ïa ka Tarabari, Gizang, Hahim, Boklapara, Khanapara-Pillangkata bad ka Ratacherra.
U Conrad u la pynpaw ba kane ka Sorkar ka don ïa ka jingkut jingmut kaba skhem ban pynïaid shakhmat ïa kane ka kam. “Khlem pep ngin sa pyntyllun shakhmat ïa ka jingïakren ha kine ki sngi ban wan,” u la ïai ban.
