Shillong, Jymmang 14
Ka Dorbar Shnong Majai, Hima Sohra ha ka 14 tarik u Jymmang, 2026, ka la leit ban aiti da ka jingthoh sha u Additional Deputy Commissioner ka East Khasi Hills District ba dei peit ïa ka Sohra Civil Sub-Division kum u SDO ban pan jingshai halor ki jingbuh jingthoh ïa ka jingïalang kaba la long ha ka 11 tarik u Jymmang, 2026.
Ka Dorbar Shnong lyngba u Bah Balajied Ïawbor, Acting Sordar bad u Bah Daminot Sohtun, General Secretary nalor kiwei-kiwei pat, ka kdew ba ka sngewkhia ha kaba ïadei bad ka jingpynïaid ïa ki trok kit mawshun lyngba ka Bholaganj Land Custom Station da ka ophis u SDO.
La ong ba ka jingkhapngiah ka surok na Ichamati sha Majai ka la long kaba sohsat bha, wat ki arshaka ki shitom ban ïaid bad ka la don ka jingjia ba ka longkmie kaba ar met ka hap ïaid kjat ban poi sha jaka sumar namar ka kali ba kit ïa ka, ka sahkut ha ka jingdheng kali na ka daw ki trok kit mawshun.
U Bah Daminot haba kren sha ki lad pathai khubor hadien ka jingwan aiti jingthoh sha u SDO, u la ong ba u Acting Sordar ka Dorbar Shnong Majai um shym la ïoh wan sha ka jingïalang ba la long ha ka 11 tarik u Jymmang, 2026 namar um don ha shnong, hynrei ha ka jingbuh jingthoh jong ka jingïalang la kdew ba u pep khnang lem katto katne tylli ki Association.
U Bah Daminot u la ïathuh ba hashwa jong u snem 2024 ka jingïaid ki trok ha surok ka la buh jingeh ïa ka ïaid ka ïeng jong kiwei pat ki kali, u la kdew ba la bun ki komiti kiba shimti ha ka ban pynïaid ïa ki kali hynrei ym don kano-kano ka jingpher lane ka ban pynduna ïa ka dheng kali.
Da kaba pynpaw ba ka Dorbar Shnong Majai ka la shimkhia ban pynïaid beit ryntih ha ka jingïatreilang bad ki bor pulit hadien u snem 2024, u la ong ba ka jingkynnoh ba pynïaid ïa ki trok kit mawshun lyngba ka Majai Land Custom Station da u Acting Sordar kam ïahap satia namar ha ka jingshisha dei ka tnad pulit Majai PCP kaba pan jingkyrshan na ka VDP Majai ban pyntyllun ïa ka kam pynïaid trok kit mawshun ban khaïi sha Bangladesh naduh u tei u snem.
U la ong ba kumba paw na ki jingbuh jingthoh la ong ba, la bynshet ha ki Committee ban pynïaid ïa ki trok kit mawshun kumta kum ka Dorbar Shnong ka khmih lynti ïa kaba bha, hynrei ka jingai pynïaid sha ki Committee ka long hi kumba ai sha ki shimet kumba la kdew da ka ophis SDO ka Sohra Civil Sub-Division ha ki jingbuh jingthoh.
Shuh-shuh u la ong ba katei ka jingïalang ha katei ka sngi ka dei halor ka jingpynïaid ïa ki trok kit mawshun lyngba ka Bholaganj Land Custom Station ïa kaba ka Dorbar Shnong Majai ka khlem lah ban shim bynta bad kumta ka jingshah kynnoh ba pep khnang na ka liang u SDO un sa jubab da ka jingthoh.
