Jowai, Jymmang 14
Kumba la kular da ka Sorkar Meghalaya kumba shispah ngut ki pulit ka jylla ki la mih madan ha ka 14 tarik u bnai Jymmang ban synran ïa ki nongrep jong ka shnong Lapangap ban leit puh ïa ki lyngkha ne pynthor kiba don markhap jong ka jylla Assam.
Ki nongrep jong ka shnong Lapangap hapoh West Jaiñtia Hills District kiba don pynthor kba markhap bad ka shnong Tahpat jong ka West Karbi Anglong District Assam kim shym la ïoh lad satia ban puh ïa la ki pynthor kba namar ka jingpyrshah jong ki nongshong shnong Tahpat.
Kumta ha ka jingkutlad ki la mih madan ha Shillong ban tur sha Secretariat ha ka 13 tarik u bnai Jymmang.
Ïa kitei ki shi spah ngut ki pulit la ïalam da u Superintendent of Police, West Jaiñtia Hills District u Jagpal Singh Dhanoa, IPS dalade ha kaba naduh ka por mynstep haduh ka por janmiet, la ïohi ïa ka jingshimkhia jong u namar u la ïakren bad ïasaid bad ki heh pulit jong ka West Karbi Anglong District bad ki nongïalam shnong ka Tahpat. Hynrei namar ka jingpyn-eh jong ki nongshong shnong Tahpat ym shym la urlong satia ka jingthmu ban puh pynthor.
U Dhanoa haba kren ha ki nongthoh khubor ha Lapangap u la ong ba ka jingthmu jong ki bad ki nongrep naduh ka por mynstep ka long ban rung sha ki lyngkha bad ban sdang ban puh na ka bynta ban rep ban riang. Hynrei u la kdew ba katei ka jaka ka hap shabar jong ka ktem Pulit Assam kaba mynta, kaba donkam ban ïoh ïa ka jingïatreilang na ka liang ka Assam.
“Ha ka aiom ot kaba la dep ruh ngi ïoh ïa ka jingïatreilang, bad kum ki ophisar jong ka aiñ, ngi sngewthuh pura ba kano kano ka jingpyndonkam bor ka lah ban wanrah ïa ki jingma kiba khlem da thmu,” la ong u Dhanoa.
U la ong ba ki pulit ka Meghalaya ki la kyrpad ïa ki nongrep ba kin kynriah noh shisngi hadien ka jingkyrpad jong u MLA ka thaiñ na ka liang ka Assam.
“Kumta, khnang ban lait na kano kano ka jingjia bad mynsaw kaba kham heh, ngi la kyrpad ïa ki nongrep jong ngi na ka liang jong nga ban kynran dien noh shisngi, ngi ai por sa shisngi sha u MLA na ka liang Assam, bad to ngin kyrmen ba ka jingrep kan sdang biang bad ka jingsuk jingsain kan neh junom,” u la pynpaw.
U Dhanoa u la ong ba ki pulit ki treikam hapoh ka rukom synshar paidbah bad ka jingïakren ka dang ïaid ban pynbeit ïa kane ka kam da kaba suk. U la bynrap ruh ba ka rai kaba khatduh lano ki nongrep kin leit phai biang sha ki lyngkha kan shong ha ka jingrai na ka liang jong ki Karbi.
“Haba nga la ong kumta, nga la dep buh ha ka rikod ba ka jaka ka hap ha ka jingïakajia, hynrei ka jinglong trai pat ka dei jong ki Lapangap kaba ym don kano kano ka jingïapyrshah”, u la ong.
U SP u la pyntip ba ki shipai SF-10 ki la don lypa ha lynti na Shillong bad lada donkam yn sa phah shuh shuh ha katei ka jaka.
Da kaba pynskhem ba katei ka jaka ka dei jong ki nongshong shnong jong ka shnong Lapangap, u Dhanoa u la maham ba uno uno uba pyrshang ban pynthut ïa ki nongrep un ngat ha ka jingshah pynshitom ha ka ain.
Haba ïathuh biang ïa ki jingjia ha katei ka sngi, u Dhanoa u la ong ba ki pulit ka Meghalaya ki la ïatreilang bad ki pulit ka Assam shwa ba ki nongrep kin ïaid sha ki lyngkha kiba don hakhmat jong ka ktem jong ki pulit ka Assam. Katkum ka jingong jong u, ki Pulit Assam ki la pynthikna ïa ka jingïatreilang kaba pura.
Hynrei u la kynnoh ba katto katne ngut ki runar ki la pyrshang ban pynthut ïa ka jingsuk bad khanglad ïa ki nongrep ban rep ïa ki jaka jong ki.
“Ka jinglong trai ïa ka jaka ha kaba la rep ïa u kba ka dei ka hok nongkynti jong ki nongshong shnong ka Lapangap bad kumjuh ruh ka jinglong trai,” u la ong bad bynrap ba ki nongshong shnong ki la rep ïa ka jaka naduh ki por mynbarim.”
U SP u la pynpaw shuh shuh ba katba ka jingïakren ka dang ïaid, la ïoh pdiang ïa ka phone na uwei u MLA ka Assam uba mihkhmat ïa ka thaiñ Tahpat, uba kyrpad ban ai por sa shisngi ban wanrah ïa ka jinglong jingman kaba suk bad ban pynsngewthuh ïa ki Karbi ha ka jaka ban pynjur ïa ka jingïakynad.
“Da kaba buh hakhmat ban pynneh ïa ka jingsuk jingsaiñ, ngi la rai na ka bynta mynta ka sngi ban ai por shi sngi ïa ka liang ka Assam,” u la ong.
U la bynrap ruh ba ki bor pynïaid ka Meghalaya kin ap ïa ka jubab na ka liang ka Assam shwa ban rai ïa ka lynti kaba bud.
Shwa kane, ka Kong Khamti-lut Lyngdoh kum ka nongrep ka pynpaw ka jingsngewsih kthang namar ka jingbym ïohlad ban puh lyngkha na ka bynta ban bet ïa u symbai. Ngi shaniah bam na ka kam rep kba, mynta pat nangno ngin ïoh bam ïoh dih. Wat hapdeng ka jingkular ban leit rep da kaba suk ba sain pynban haba poi ha jaka rep ym ïoh lad wat tang ban puh.
“Kine ki jaka rep ym dei kiba ngi shu thied, hynrei kiba ngi ïoh pateng na ki kmie bad kpa tymmen. Mynshwa ki nong Tahpat ki long tang ki bylla ha ki kmie kpa tymmen jong ngi, hynrei mynta pat ki kam trai kylla ïa ki hali pynthor jong ngi’, la ong ka Kong Lyngdoh.
Kala kyrpad ïa ka sorkar Meghalaya naduh u Myntri Rangbah Conrad Sangma ba un sngewbha ban ïakren namar ki kot ki sla ki jaka puta ki don shapoh Meghalaya. Kala ong ba ki Karbi ki buh shi buh tarik bad phah ap haduh da kut ka ilekshon ha ka Jylla Assam.
Katba u General Secretary ka HFU Bah Allfondbirth Kharsyntiew uba la synrang lang ïa ki nong Lapangap sha ki jaka rep, u la pynpaw ka jingsngewsih namar ka jingbym ïoh lad ki Lapangap wat tang ban ïuhkjat ha ki hali ki pynthor jong ki.
“Kato ka jingïakren ha Secretariat ha ka 13 tarik haduh mynta ka sngi ka fail. Kane ka mat ka long kaba kongsan. Tang kita kiba phong ïa ka juti ba don u prek, haba ki ïaid ki sngewthuh ïa ka jingdung bad ka jingpang, bad dei tang ki nongrep kiba hapoh Lapangap kiba kthang mynsiem bad jaw ummat namar da ei kin bsa ïa ka ïing ka sem.
U la maham ïa ka sorkar ban shimkhia ïa kane ka kam bad maham ruh ban leit wat shaduh u Myntri Kam Pohiing ka sorkar kmie u Amit Shah ban pynsngew halor ka mat ba ïadei bad ka jingeh ki nong Lapangap.
