Shillong, Jymmang 15
Ka Khasi Students’ Union (KSU) Upper Shillong Circle hapoh ka jingïalam u Samla Nangshngaiñbha Lakiang, Assistant General Secretary, u Samla Mankhrawbok Marbaniang, Organising Secretary, ha ryngkat ka jing synranlang ki dkhot, ha ka 15 tarik u Jymmang 2026, ki la leit ïakynduh ïa u Executive Director ka NHIDCL halor ka jingbakla ban thoh ïa ki kyrteng shnong naduh na surok Umshyrpi ter-ter haduh Pomlum bad kumjuh sha Mylliem.
Ka Seng ka la buh ruh ïa kawei ka mat jingdawa, halor ka jingbym phikir katei ka kompeni, ban tap bha ïa ki slep nala haduh ba iwei i heprit i la hap hapoh katei ka nala.
Haba kren sha ki lad pathai khubor u Samla Nangshngaiñbha u la ong ba ka seng ka la rah ïa ki mat ba ki kyrteng shnong ha Surokbah Umshyrpi ter-ter ki la bakla lut, ban dawa ba dei ban pynbeit noh mardor.
La ïohi ruh ba ka kyrteng Mylliem ruh ka bakla, ka kyrteng ba la thoh ha Umshyrpi ruh, kaba dei ban hok ban thoh ‘Sohra’ hynrei la thoh ‘Cherrapunji’ bad kiwei kiwei de ki jingbakla ha ka thoh kyrteng shnong.
Ha ka jingïakren bad ka KSU, u Samla Nangshngaiñbha u la ïathuh ba na ka liang u Executive Director, u la kular ban pynbeit noh mardor bad shim khia ïa kine ki mat ba la buh da ka seng hapoh shi taïew.
