Shillong, Jymmang 15
U Kpa jong u wei u Samla uba la suba shah bom haduh ban da ïap ha Ïingdorbar Shnong ha Pynter, kata ha u Rangbah Shnong, u Bah Fullmoon Khongsdoh bad ki dkhot ka Village Defence Party (VDP) katei ka shnong, u la leit ban buh da ka Zero FIR ha Sadar Police Station myn ha ka 05 tarik u Jymmang 2026.
Ka Shnong Pynter kadei kaba hap hapoh ka Pynursla Civil Sub Division.
Katkum ka Zero FIR la ong, ba katei ka jingjia suba bom ïap ka la jia ha ka miet jong ka 07 tarik u ?aïong, 2026, bad ki dkhot VDP ki la wan buh ïa ka metïap ha ka step 08 tarik u Ïaïong, 2026 ha ïingsah jong u. Ka durkhih halor kane ka jingjia ka la saphriang hynnin ka sngi ha ki rynsan social media.
La ong ba la song ïa ka metïap ha ka byrni ha ka por ba wanrah bad la tep ïa ka metïap ha ka 09 tarik u Ïaïong, 2026, khlem da ai lad ïa u nongujor uba dei u kpa wat tang ban pynsum khatduh ïa ka metïap.
Shuh shuh la ong, ba u kpa um ïoh peit khatduh ïa ka metïap u khun, namar ba ïa ka synduk ruh la tap da u Rangbah Shnong.
U kpa u ong ba ha ka por ba leh burom khatduh ïa kaba sah jong u, u la ong ba u khlad namar ba ka jingïap ka dei na ka jingbam jong u ïa ki ïit.
Hynrei ynda la saphriang kawei ka durkhih, u sa tip ba ka jingïap u khun jong u, ka dei na ka jingsuba shah bom palat pud ïa kaba ki pulit ki la kurup noh ïa ka durkhih bad dei lyngba kane ka durkhih ba u kpa u sa ujor da ka ejahar sha ki pulit. Ïa ka FIR la phah kopi sha u Superintendent of Police (SP) ka East Khasi Hills District, ha ka 06 tarik u Jymmang, 2026 bad sha u Officer Incharge ka Pynursla Police Station ha ka 08 tarik u Jymmang, 2026.
Ha kawei ka liang, la ïoh pdiang jingtip ruh ba kiba donkti ha ka ban bom ïa u tei u samla, ki la dep shim jamin lypa bad ïaid laitluid. Katei ka durkhih ba 59 sekhon, ka pyni ïa ka jingshah bom utei u samla ha kawei ka ïing ha ka rukom kaba i shyrkhei bha.
